Засгийн газрын ээлжит хуралдаан өнөөдөр болж, дараах асуудлуудыг хэлэлцэн шийдвэрлэлээ.

Ерөнхий сайд Л.Оюун-Эрдэнэ энэ сард орон нутагт томилолтоор ажиллаж байна. Өнөөдрийн байдлаар 10 аймагт ажиллажээ. Энэ талаарх танилцуулгыг Засгийн газрын хуралдаанаар хэлэлцэн холбогдох шийдвэрүүдийг гаргаж буй.

Өнөөдрийн хуралдаанаар энэ сарын 14-19-нд Дархан-Уул, Сэлэнгэ, Архангай аймаг, газар тариалангийн бүс нутагт Ерөнхий сайд ажиллаж орон нутагт хэрэгжиж байгаа төсөл, хөтөлбөр болон ургац хураалтын явцтай танилцаж, иргэдтэй уулзаж санал, хүсэлтийг нь сонссон талаар хэлэлцсэн байна.

Ерөнхий сайд орон нутагт ажиллахдаа иргэдийн өөрсдийнх нь эрэмбэлсэн томоохон бүтээн байгуулалт, төсөл хөтөлбөрийг ирэх оны төсөвт тусгуулахаар болжээ. Энэ хүрээнд Дархан-Уул аймагт 9, Сэлэнгэ аймагт 7, Архангай аймагт 7 томоохон төсөл, хөтөлбөрийг хэрэгжүүлнэ.

• Эдгээр аймгийн иргэдтэй хийсэн уулзалтын үеэр саналыг нь авч эрэмбэлсэн, аймаг тус бүрд 2024 онд хэрэгжүүлэх боломжтой бүтээн байгуулалт, төсөл, хөтөлбөрийг Монгол Улсын ирэх оны төсөвт тусгаж ажиллахыг Сангийн сайд Б.Жавхланд,
• “Шүүр” ажиллагааны хүрээнд төрийн болон улс төрийн албан тушаалын томилгооны байдлыг шалгаж, Засгийн газарт танилцуулахыг Засгийн газрын Хяналт хэрэгжүүлэх газрын дарга Б.Баасандоржид,
• Хөтөл “Цемент шохой” ТӨХК-ийн үйл ажиллагаа, үүргийн хэрэгжилт, хүний нөөцийн байдлыг шалгаж, үр дүнг Засгийн газарт танилцуулахыг ТӨБЗГ-ын дарга Б.Цэнгэл, “Эрдэнэс Монгол” ХХК-ийн гүйцэтгэх захирал С.Наранцогт нарт,
• Дарханы арьс ширний цогцолборт үүссэн нөхцөл байдал, төсөлд хөрөнгө оруулсан аж ахуйн нэгжийг хохиролгүй болгох асуудлыг судлан Засгийн газарт танилцуулахыг Сангийн сайд Б.Жавхланд,
• Сэлэнгэ аймгийн Алтанбулаг боомтын үйл ажиллагаа, барилга байгууламж, дэд бүтцийн өргөтгөл, шинэчлэлийг эрчимжүүлэхийг Монгол Улсын Шадар сайд бөгөөд Эдийн засаг, хөгжлийн сайд Ч.Хүрэлбаатар, Боомтын сэргэлтийн үндэсний хорооны дарга Б.Тулга нарт,
• Орон нутагт иргэдтэй хийсэн уулзалтаар төсвийн төлөвлөлтийн системд бүртгэгдээгүй шинээр орж ирсэн хөрөнгө оруулалтын төсөл, хөтөлбөрүүдийг Сангийн яаманд тухай бүр албажуулан хүргүүлэхийг Засгийн газрын холбогдох гишүүдэд тус тус даалгажээ.

Amlalt.mn