Ардчилсан нам болон Ардчилсан намын бүлгээс цаг үеийн асуудлаар мэдээлэл хийлээ. Тэд хөдөө орон нутагт үүсээд буй зудын нөхцөл байдал, малчдын амьжиргааны асуудлыг хөндөв.
Энэ үеэр УИХ-ын гишүүн О.Цогтгэрэл, "Хөдөө аж ахуйн салбарт тулгамдаж байгаа асуудлыг харахад бид богино, дунд, урт хугацаанд юу хийх вэ гэдгийг ярих цаг иржээ. Тэр дундаа сүүлийн жилүүдэд Монголын хөдөө аж ахуйн салбарт аргацаасан бодлогууд асар их явснаас болж бид аливаа эрсдэлд бэлтгэлгүй нөхцөл байдалд орж байна. Яг одоогийн энэ цаг агаарын шалгалт бол малчдаас биш Монголын төрөөс авч байгаа шалгалт. Үндсэндээ бид энэ шалгалтад уналаа.
Энэ асуудлын гол учир шалтгаан бол хөдөө аж ахуйн салбарын өдөр хоногийг аргацаасан шийдвэрүүд болоод сонгуулийн санал авахын тулд алсыг харалгүй зөвхөн өнөөдрөөр нь явж ирсэнтэй холбоотой. Өнгөрсөн хугацаанд хотын иргэдийг махаар хангахын тулд малчдыг орлогогүй болгож, махны үнийг барьж экспортод гарах боломжийг хааж, квоттой болгож олон зүйлийг улс төрийн шийдвэрээр явсны гайгаар малчид хашаа хороо, өвс тэжээлгүй, орлогогүй болсон. Эцсийн эцэст энэ чинь мөнгөгүй учраас бэлтгэлээ сайн хангаж чадаагүй асуудал. Ийм байхад яаж өвөлд бэлэн байх вэ.
Монголын мал аж ахуйн салбарт даатгал алга, орлого олох боломжууд нь алга. Энэ бүгдийг нь боомилчихсон, хаачихсан. Дээрээс нь малын халдварт өвчний улмаас мал үнэгүйдсэн зэрэг олон олон зүйлийг энд дурдаж болно" гэлээ.
Эх сурвалж: Eguur.mn
