Ардчилсан намын даргын сонгуультай холбоотойгоор УИХ-ын гишүүн, Үндэсний бодлогын хорооны Дотоод сонгуулийн хорооны дарга С.Эрдэнэболд тэргүүтэй тус намын гишүүд мэдээлэл хийлээ.

УИХ-ын гишүүн, АН-ын ҮБХ-ны Дотоод сонгуулийн хорооны дарга С.Эрдэнэболд “Ардчилсан намын төлөөллийн төв байгууллага болох ҮБХ өчигдөр хуралдсан. Энэхүү хурлаар АН-ын удирдлага буюу дараагийн даргыг сонгох тухай асуудлыг хэлэлцэн шийдвэрлэсэн юм. Ийнхүү наймдугаар сарын 29 буюу өнөөдрийн 11.40 цагаас оройны 18.00 цаг хүртэл АН-ын даргыг сонгох сонгуульд нэрээ дэвшүүлэх нэр дэвшигчдийг бүртгэж авна.

Намын үндсэн дүрэм болон намын даргыг сонгох журамд зааснаар намын төлөөллийн байгууллага буюу ҮБХ сонгуульт гишүүнээр дөрвөөс доошгүй жил ажилласан, АН-ын гишүүн АН-ын даргад нэрээ дэвшүүлэх эрхтэй. Дүрэм болон журамд заасан уг шаардлагыг хангасан хүн холбогдох материалаа бүрдүүлж өнөөдөр 18.00 цагаас өмнө авчирч өгөх боломжтой юм. Дотоод сонгуулийн хороо буюу сонгон шалгаруулах хороог 15 хүний бүрэлдэхүүнтэйгээр байгуулан ажиллаж байна. Эдгээр 15 нэр бүхий хүмүүс бол АН-ын ҮБХ-ны гишүүд юм. Бид дотоод сонгуулийн хороотойгоо хамтран ажиллаж байна.

Улс төрийн намын тухай хууль болон Ардчилсан намын дүрэм, Намын даргыг сонгох журам гэж бий. Энэ журмын дагуу шаардлага хангасан нэр дэвшигчдэд мандат олгож, өрсөлдүүлэхээр ҮБХ-нд танилцуулах юм. Ардчилсан нам өмнө нь хоёр хуваагдаж байсан учраас бүхий л хурлын шийдвэрээ видео, аудио, цаасан тэмдэглэлээр баталгаажуулж явж байгаа.

Үндэсний бодлогын хорооны хуралд шаардлага хангасан нэр дэвшигчид өөрсдийн мөрийн хөтөлбөрөө танилцуулж өрсөлдөнө. Ялалт байгуулсан нэр дэвшигчийг бид намын их хурлаараа батламжлах заалттай байгаа. Олон нэр дэвшигч гарсан тохиолдолд 2, 3 шатны өрсөлдөөн гарч болох дүрмийн зохицуулалт бий.Ингэхдээ дийлэнх олонхын санал авч чадаагүй буюу 10 хувиас доош санал авсан нь хасагдана.

ҮБХ өнөөдрийн 18.00 цаг хүртэл нэр дэвшигчдийг бүртгэж авч, 19.00 цагт тухайн хүний материал нь үнэн зөв эсэх, намын дүрэм, журамд нийцэж байгаа эсэхийг дүгнэнэ. Мөн дэвшүүлж байгаа мөрийн хөтөлбөр намын үзэл баримтлалд нийцэж буй эсэх дүгнэлт гаргах юм.

2019 оны нэгдүгээр сарын 19-ний өдөр Улсын дээд шүүхэд бүртгэгдсэн Ардчилсан намын үзэл баримтлалын эдийн засаг, шударга ёс, үндэсний эрх чөлөө зэрэг таван эрх чөлөөтэй мөрийн хөтөлбөр нь нийцэж байгааг дүгнэнэ. Хүний эрх чөлөөний эсрэг үзэл санаа огт байж болохгүй. Нээлттэй эдийн засаг, чөлөөт нийгмийн үзэл санаа, эерэг хандлагыг бий болгоход нийцэж буй эсэхэд хяналт тавина гэсэн үг.

АН-ын даргыг Үндэсний бодлогын хорооны 390 гишүүн шийднэ. Ардчилсан намын даргыг аль нэг нам, улс төрийн хүчин, аль нэг мөнгө, явцуу ашиг сонирхол шийдэх боломж үгүй.

Ардчилсан нам дүрэмтэй, журамтай нам. Хуультай улсын түүхтэй нам юм. Саруул ухаант хүмүүсийн сонголтоор АН-ын дараагийн удирдлагыг сонгож чадна гэдэгт итгэл төгс байна. Өнөөдөр АН-ын 200 мянган гишүүд дотроос боловсролтой, үнэт зүйлтэй, ухаалаг, ачаа үүрэх сэтгэлийн хаттай, үзэл санааны манлайллыг авч явах мянга мянган залууст Ардчилсан намын хаалга нээлттэй.” хэмээн мэдэгдлээ.