Мөрдөн шалгах албаны үйл ажиллагааны тайлангийн хурал 2025 оны 12 сарын 30-ний өдөр боллоо. Тус хуралд Цагдаагийн ерөнхий газрын Тэргүүн дэд дарга, цагдаагийн хурандаа Б.Ганчулуун, Улсын ерөнхий прокурорын газар, Нийслэлийн прокурорын газрын удирдлагууд болон даргын зөвлөлийн гишүүд, алба, нэгж, нутаг дэвсгэр хариуцсан мөрдөн шалгах хэлтэс, тасаг, хэсгийн дарга, алба хаагчид танхимаар 198, цахимаар 654 алба хаагч тус тус оролцлоо.

Хурлын үеэр Мөрдөн шалгах албанаас энэ онд хэрэгжүүлсэн бодлого, чиглэл, үйл ажиллагааны талаарх мэдээллийг танилцуулж, хэргийн шийдвэрлэлтээр бусдыгаа манлайлан ажилласан “Ажил мэргэжлийн аварга алба хаагч, хамт олон”, “Шилдэг мөрдөгч” нарыг шагнаж урамшуулав.

Мөрдөн шалгах албаны “Ажил мэргэжлийн аварга мөрдөгч”-өөр Сонгинохайрхан дүүргийн цагдаагийн газрын нэгдүгээр хэлтсийн мөрдөгч, цагдаагийн дэслэгч Н.Эрдэнэбаяр, Дархан-Уул аймгийн цагдаагийн газрын мөрдөгч, цагдаагийн ахлах дэслэгч Д.Энхбаясгалан, Тээврийн цагдаагийн албаны Мөрдөн шалгах хэлтсийн ахлах мөрдөгч, цагдаагийн ахлах дэслэгч С.Дэмбэрэл, Мөрдөн шалгах албаны Дүн шинжилгээ, үнэлгээ, хяналт шалгалтын хэлтсийн чиглэлийн ахлах мөрдөгч, цагдаагийн хошууч Т.Мөнхбат, Хүүхдийн эсрэг болон Хүүхдээс үйлдсэн гэмт хэрэг мөрдөх хэлтсийн ахлах мөрдөгч, цагдаагийн ахлах дэслэгч Э.Балдандорж, “Ажил мэргэжлийн аварга Удирдах алба хаагч”-аар Хүнд гэмт хэрэг мөрдөн шалгах хэлтсийн дарга, цагдаагийн хурандаа Д.Энхтөр, “Ажил мэргэжлийн аварга хамт олон”-оор цагдаагийн хошууч Б.Эрдэнэдалай даргатай Баянгол дүүргийн цагдаагийн газрын нэгдүгээр хэлтсийн Мөрдөн шалгах тасаг тус тус шалгарав.

Хурлын төгсгөлд Цагдаагийн ерөнхий газрын Тэргүүн дэд даргаас бие бүрэлдэхүүнд хандан баяр хүргэж, ажлын амжилт хүссэнээр хурлыг өндөрлүүллээ.

Эх сурвалж: police.gov.mn