НИТХ-ын дарга бөгөөд Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн дарга А.Баяр Нийслэлийн прокурорын газарт ажиллав.
НИТХ-ын мэдээлснээр, нийслэлийн прокурорын газар гэмт хэрэг зөрчлийг бууруулахаар хэрэгжүүлж буй ажлаа танилцуулжээ. Авлига, албан тушаалын гэмт хэргийг бууруулах ажлын хүрээнд Авлигатай тэмцэх газартай хамтран ажилласан нь үр дүнтэй байгааг онцоллоо.
НИТХ-ын дарга А.Баяр "Аль төрлийн гэмт хэрэг өссөн, буурсан зэрэг дүн шинжилгээг гэмт хэргийн зөвлөлийн байгууллагуудад өгч мэдээллээр хангах хэрэгтэй. Үүнд нийслэлийн прокурорын газар идэвх санаачилгатай ажиллах ёстой. 2026 онд Нийслэлийн прокурорын газартай судалгаа шинжилгээний ажилд хамтран ажиллахыг зорьж байна. 2025 онд залилах, хулгайлах, хүний эрүүл мэндийн эсрэг гэмт хэрэг өссөн. Энэ төрлийн гэмт хэргийг хэрхэн бууруулах ажлыг ирэх оны төлөвлөгөөнд тусгахаар ажиллаж байна" гэв.
Мөн нийслэлийн гэмт хэрэг, зөрчлийг бууруулах салбар зөвлөлийн гишүүн байгууллагууд ирэх оны төлөвлөгөөндөө үүнийг онцгой анхаарч ажиллахыг үүрэг болголоо.
Прокурорын байгууллагын алба хаагчдын нийгмийн баталгаа хангах, мэргэжлийн ур чадварыг сайжруулж чадавхжуулах талаар санал солилцов.
Amlalt.mn
