Шүүхийн ерөнхий зөвлөлийн дарга П.Золзаяа, гишүүн Ч.Баянжаргал, Л.Өлзийжаргал, Гүйцэтгэх нарийн бичгийн дарга Б.Эрдэнэтулга нар өнөөдөр (2026.04.16) Канад Улсын засгийн газар, гадаад хэргийн яамны дэмжлэгтэй хэрэгжиж буй “Тэгш эрх, шударга ёсыг хүн бүрд” /EJAM/ төслийн удирдагч, Канад Улсын Нью Брансвик мужийн Давж заалдах шатны шүүхийн Ерөнхий шүүгч Марк Ричард, Канад Улсын Холбооны шүүхийн асуудал эрхлэх газрын Олон улсын хөтөлбөрийн захирал Олег Шаков, Канад Улсын Бритиш Колумбийн дээд шүүхийн шүүгч Том Крабтри нарыг хүлээн авч уулзлаа.
“Тэгш эрх, шударга ёсыг хүн бүрд” (EJAM) төсөл нь 2025–2030 онд хэрэгжих бөгөөд шүүхийн хараат бус байдлыг бэхжүүлэх, иргэдийн шүүхэд итгэх итгэлийг нэмэгдүүлэх болон шударга ёсны хүртээмжийг сайжруулах зорилготой.
Шүүхийн ерөнхий зөвлөлийн дарга П.Золзаяа: Канад Улсын Засгийн газар, гадаад хэргийн яамны дэмжлэгтэй 2022-2024 оны хооронд хэрэгжсэн техникийн туслалцааны “Жендерийн мэдрэмжтэй сайжирч хөгжсөн шүүхийн тогтолцооны үр шимийг Монгол Улсын иргэд хүртэх нь” төслийн үргэлжлэл болж, “Тэгш эрх, шударга ёсыг хүн бүрд” (EJAM) төсөл хэрэгжиж байгаад баяртай байна. Шүүхэд итгэх иргэдийн итгэлийг нэмэгдүүлэх зорилготой энэ төсөл Шүүхийн ерөнхий зөвлөлийн хувьд онцгой ач холбогдолтой бөгөөд шинээр бүрдсэн Ерөнхий зөвлөл энэ төслийг үр дүнтэй хэрэгжүүлэхэд та бүхэнтэй бүхий л талаар хамтран ажиллах болсондоо баяртай байгаа талаар онцлон дурдсан.
Төслийн 2026–2027 оны жилийн төлөвлөгөөнд Шүүхийн ерөнхий зөвлөлөөс тусгасан ажлуудыг хэрхэн үр дүнтэй хэрэгжүүлэх талаар санал солилцож, Шүүхийн ерөнхий зөвлөлийн гишүүн Л.Өлзийжаргал: Иргэд, олон нийтийн дунд шүүхийн тогтолцооны суурь үнэт зүйлсийн талаарх мэдлэг ойлголтыг нэмэгдүүлэх, Шүүгчийн хууль ёсны ашиг сонирхлыг хамгаалах, шүүхийн бие даасан хараат бус байдлыг хангах чиг үүргийн хүрээнд Шүүх эрх мэдлийн байгууллагын олон нийттэй харилцах стратеги боловсруулах саналыг дэвшүүллээ.
Мөн иргэд олон нийтэд эрх зүйн туслалцаа үзүүлэх замаар шүүхийн үйлчилгээг тэгш хүртээмжтэй хүргэх тогтолцоог бий болгох, Шүүхийн захиргааны ажилтнуудад сэтгэл зүйн зөвлөгөө өгөх сургалт зохион байгуулах, Шүүхийн захиргааны ажилтнуудын гүйцэтгэлийн үнэлгээг судалж, стандарт боловсруулах зэрэг ажлуудыг хэрхэн үр дүнтэй хэрэгжүүлэх талаар санал солилцов.
“Тэгш эрх, шударга ёсыг хүн бүрд” (EJAM) төслийг Канад Улсын Холбооны шүүхийн хэрэг эрхэлсэн комиссарын газар хэрэгжүүлж, Монгол Улсын Дээд шүүх, Шүүхийн ерөнхий зөвлөл, Шүүхийн сахилгын хороо, Монголын шүүгчдийн холбоо, Шүүхийн академи болон иргэний нийгмийн байгууллагууд хамтран хэрэгжүүлж байна.
МЭДЭЭЛЛИЙН ТӨВ
ГАДААД ХАРИЛЦАА, ХАМТЫН АЖИЛЛАГААНЫ ГАЗАР
