Улсын Их Хурлын гишүүн, Улсын Их Хурал дахь Монгол-Польшийн парламентын бүлгийн дарга Ж.Золжаргал тэргүүтэй гишүүд Бүгд Найрамдах Польш Улсын Сеймийн гишүүн, Польш-Монголын парламентын бүлгийн дарга С.Горчицагийн урилгаар Бүгд Найрамдах Польш Улсад айлчилж байна.
Айлчлалын хүрээнд /2026.04.15/ тус улсын Сеймийн дэд маршал (парламентын дэд дарга) Дорота Нежелад бараалхаж, хоёр улсын хооронд дипломат харилцаа тогтоосны түүхт 76 жилийн ойн өдрөөр Бүгд Найрамдах Польш Улсын Сеймийн гишүүн, Польш-Монголын парламентын бүлгийн дарга С.Горчица тэргүүтэй тус бүлгийн гишүүдтэй бүлэг хоорондын албан ёсны уулзалт хийлээ.
Энэ хүрээнд төлөөлөгчид Бүгд Найрамдах Польш Улсын Сейм дэх Эдийн засаг, хөгжлийн байнгын хорооны дарга Рафал Камаревич, Хөдөө аж ахуй, хөдөөгийн хөгжлийн байнгын хорооны дарга Мирослав Малишевски, Эмэгтэйчүүдийн эрхийн парламентын бүлгийн дарга Ванда Новицка нартай уулзаж, хууль тогтоох байгууллага хоорондын болон парламентын бүлэг хоорондын хамтын ажиллагааг бэхжүүлэх талаар санал солилцсон юм.
Бүгд Найрамдах Польш Улсын Сеймийн дэд маршал (парламентын дэд дарга) Дорота Нежела төлөөлөгчдийг айлчилж буйд талархал илэрхийлж, Монгол Улсыг парламентын дипломат бодлогыг хөгжүүлж байгааг сайшаагаад, ардчиллын замнал нэгтэй Монгол Улсаас суралцах зүйл олон байгааг онцлов. Мөн тэрбээр техник, технологийн салбарын тухайд сүүлийн үед хүч түрэн гарч буй шинэ технологийг кибер аюулгүй байдалтай хэрхэн холбох талаар өөрийн байр сууриа илэрхийллээ.
Бүлгийн дарга Ж.Золжаргал Бүгд Найрамдах Польш Улс бол Монгол Улсын Гуравдагч хөрш бөгөөд Европ дахь итгэлт түнш гэдгийг онцлон дурдаад Монгол Улс 1992 онд ардчилсан шинэ Үндсэн хуулиа батлан боловсруулахдаа Бүгд Найрамдах Польш Улсын Үндсэн хуулийг жишиг болгон ашигласан гэлээ. Тэрбээр, 2024 оны ээлжит сонгуулиар бүрэлдсэн Монгол Улсын Их Хурлын бүтэц, бүрэлдэхүүн, цахим парламент (D-Parliament) болон цахим шилжилтийн талаар товч танилцуулав.
Цаашид Бүгд Найрамдах Польш Улсаас Монгол Улсад хийсэн геологи, шинжлэх ухааны салбарын хамтын ажиллагааг эдийн засагт өгөөжтэй хэлбэрт шилжүүлэх шаардлагатай байгаагаа илэрхийллээ.
Үүний дараа С.Горчица тэргүүтэй парламентын бүлгийн гишүүдтэй уулзахдаа хоёр улсын хооронд сүүлийн жилүүдэд хэрэгжсэн дээд, өндөр түвшний харилцан айлчлалууд нь хамтын ажиллагааг өргөжүүлэн хөгжүүлэхэд чухал хувь нэмэр оруулж байгааг онцолж, хөрөнгө оруулалтыг дэмжих, эдийн засгийн агуулгаар баяжуулах нь чухал гэдгийг цохон тэмдэглэв.
Энэ үеэр Бүгд Найрамдах Польш Улсын Сейм дэх Эдийн засаг, хөгжлийн байнгын хорооны дарга Рафал Камаревич, Хөдөө аж ахуй, хөдөөгийн хөгжлийн байнгын хорооны дарга Мирослав Малишевскитэй нартай уулзаж хоёр улсын харилцаа, хөдөө аж ахуйн тоног, төхөөрөмжийн худалдан авалт, засвар үйлчилгээний нэгдсэн системийг Монгол Улсад нутагшуулах, хүнсний болон эмийн ургамлын эдийн засгийн эргэлтийг нэмэгдүүлэх талаар ярилцав.
Мөн түүнчлэн Улсын Их Хурлын гишүүн Д.Үүрийнтуяа, Д.Ганмаа нар Бүгд Найрамдах Польш Улсын Эмэгтэйчүүдийн эрхийн парламентын бүлгийн дарга Ванда Новицка тэргүүтэй тус бүлгийн гишүүдтэй уулзаж, хоёр улсын парламент дахь эмэгтэйчүүдийн оролцоо, цаашдын хамтын ажиллагааны талаар санал солилцлоо гэж Улсын Их Хурлын Хэвлэл мэдээлэл, олон нийттэй харилцах газраас мэдээллээ.
