Гэмт хэргээс урьдчилан сэргийлэх ажлыг зохицуулах зөвлөл, Хууль зүй, дотоод хэргийн яам, Хөдөлмөр, нийгмийн хамгааллын яамтай хамтран “Гэр бүлийн хүчирхийлэлтэй тэмцэхэд олон талт хамтын ажиллагаа” хамтарсан багийн үндэсний V чуулганыг өчигдөр Төрийн ордонд зохион байгууллаа.
Чуулганы үеэр УИХ-ын гишүүн Б.Баярсайхан сэтгүүлчдэд мэдээлэл өглөө.
Тэрбээр “Хамтарсан багийн ажил үр дүнд хүрдэггүй хэд хэдэн шалтгаан бий.
Нэгдүгээрт, сургуулийн эмч, цагдаа, нийгмийн ажилтан гэх мэт төрийн албан хаагчид маш их ачаалалтай ажилладаг. Тиймээс хүчирхийлэл гарсан хүн бүрт хүрч үйлчилж чадахгүй. Ямарваа нэмэлт цалин урамшуулал ч авдаггүй.
Хоёрдугаарт, Хүүхэд хөгжил, хамгааллын зардалд зориулагдсан найман тэрбум төгрөгөөс маш бага хувь нь улс даяар байгаа 700 гаруй хамтарсан багт очиж байгаа.
Хамтарсан багийн ажилтай газар дээр нь очиж танилцахад төсөв мөнгө хүрэлцэхгүй, ямарваа нэг хүчирхийллийн дуудлага ирэхэд машин техник, шатахуун, бичиг цаасны зардал байхгүй, сэтгэл зүйн зөвлөгөө өгөх газар, боломж дутмаг гэх мэтчилэн олон асуудал ажиглагддаг.
Энэ нь нэг ёсондоо төрийн албан хаагчдын ачааллыг нэмэгдпүүлж байгаагаас бодит үр дүн гарахгүй байна.
2021 оны 10 дугаар сард гарсан Гэр бүл, хүүхэд, залуучуудын газрын тайланд нэг хамтарсан багийн жилийн төсөв 200 гаруй мянган төгрөг байгааг тусгасан байсан. Энэ бол маш хангалтгүй дүн.
Тиймээс энэ жилийн төсвөөр хамтарсан багийг дэмжих сайн үр дүн гарна гэдэгт итгэж байна” гэлээ.
