Улсын Их Хурлын Эдийн засгийн байнгын хорооны өчигдрийн хуралдаанаар Төр, хувийн хэвшлийн түншлэлийн тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлэг, Монгол Улс, Азийн дэд бүтцийн хөрөнгө оруулалтын банк хоорондын Зээлийн хэлэлцээр (Мөчлөг сөрсөн бодлогын арга хэмжээг дэмжих хөтөлбөр)-ийн төслийг зөвшилцөв.

Энэ үеэр хэлэлцэж буй асуудалтай холбогдуулан Улсын Их Хурлын гишүүн Н.Ганибал, Ц.Цэрэнпунцаг нар байр сууриа илэрхийлэв.

УИХ-ын гишүүн Н.Ганибал “Валютын нөөцөө нэмэгдүүлэхийн тулд зээл авдаг улс хэр их байдаг юм бол доо. Монгол Улсын иргэн бүр 30 сая төгрөгийн өртэй болсон. МАН-ынхан өрийг багасгана гэсэн. Өнөөдөр нэмж зээл авах тухай ярьж байгаа нь утгагүй юм.

Дутуу цоорхой болгоноо зээлээр нөхөх юм бол өнөөх 30 сая чинь нэмэгдэнэ л гэсэн үг. Тиймээс үүнийг дэмжихгүй байна.

Үүний оронд нүүрсний хулгайн асуудлаа цэгцлэхэд анхаарсан нь дээр байх” гэлээ.