Ардчилсан намын гишүүн Э.Бат-Үүл цаг үеийн асуудлаар Itoim.mn сайтад ярилцлага өгчээ.
Тэрбээр “Хотын даргын ажлаа өгөөд л хөдөө гарч амьдарсан. Хийж байсан ажлыг маань зогсоох, нураахыг хажуунаас нь хараад суухад сэтгэл шимшрээд хэцүү юм билээ. Тэгээд л хөдөө гарсан. Хөдөө амьдрахад амар тайван, алгуур наазгай сайхан юм байна.
Залуус маань улстөрчдийн хулгайг тэвчихээ больж тэмцээд дэлхийд үлгэр жишээ үзүүлж байна. Мундаг байна. Дэлхийн том хэвлэлийн ихэнхээр нь энэ мэдээ явлаа. Органик жагсаал бол эргэлзээгүй мөн. Энэ жагсаалыг өөрийн улстөрд ашиглах гэсэн хүчнүүд жагсаалын эргэн тойронд яс горьдсон нохой аятай явж байгаа. Элдэв эсийн хов зохиож л байгаа. Улстөрчдөд л ашиглуулж болохгүй. Нэг удаа айхтар ашиглуулсан шүү дээ. Одоо ашиглуулбал залуусын органик тэмцэл ахиж сэхэл авахгүй! Бас залуусын тэмцлийг хүчирхийлэл рүү эргүүлж хэрхэвч болохгүй. Хүчирхийлэл дарангуйлалд хүргэнэ. Хүчирхийллийн эцсийн зогсоол дарангуйлал байдаг!
АН 2024 оноос өмнө ээлжит бус сонгууль явуулж, дахин үнэмлэхгүй олонхи болохын тулд өөрсдөө жагсаал зохион байгуулж байна гэж МАН бодсон бол үйлийн үргүй тэнэг нам байж таарна. Залуусын энэ тэмцлээр тогловол МАН өөрөө зад үсэрнэ. Хулгайч төрийг халахаас нааш залуусын тэмцэл зогсохгүй!
Парламентыг тарааж, ээлжит бус сонгууль явуулах нөхцөл байдал үүсвэл Баабарын жиргэснээр төрийн тогтворгүй байдал, үүнийгээ дагаад нийгмийн тогтворгүй байдал гинжин урвалд орно. Улмаар тогтворгүй байдлыг дийлэхээ байсан Монгол Улс алсдаа хагаран хуваагдаж зад үсэрнэ. Тэгэх юм бол У.Хүрэлсүх Монголын ард түмний “хараалыг мөнхөд хүртэх" хамгийн сүүлчийн ерөнхийлөгч болно. Ерөнхийлөгч У.Хүрэлсүх үүнийг яавч хүсэхгүй” хэмээжээ.
