Улсын дээд шүүх Ардчилсан намын даргаар Л.Гантөмөрийг бүртгэсэн. Шинээр бүртгэгдсэн дарга удирдлагын багаа хараахан бүрдүүлээгүй байгаа.
Одоогоор хуульч, Ч.Өнөрбаяр Дээд шүүхэд бүртгэгдсэн Ардчилсан намын Ерөнхий нарийн бичгийн даргаар ажиллаж байгаа. Түүнийг генсекеер сонгоогүй, харин анх “нийлэхдээ” л тэрээр энэ албан тушаалд очсон. Ц.Элбэгдорж Ерөнхийлөгчийг ажиллаж байхад хуулийн зөвлөхөөр нь ажиллаж байсан билээ. Нэг үгээр хэлбэл, Ч.Өнөрбаярыг Ц.Элбэгдорж гэж харахад хол зөрөхгүй болов уу. Түүнийг генсек хэвээр үлдээвэл Ардчилсан нам дахь Ц.Элбэгдоржийн нөлөө төдий хэмжээгээр байна гэсэн үг. Энэ мэт фракц бүрээс тодорхой албан тушаалд томилох бололтой.
АН-ын дарга Л.Гантөмөр удирдлагын багаа хэзээ, хэрхэн бүрдүүлэх талаар өөрөөс нь тодруулсан юм. Тэрээр “Ардчилсан намын хувьд яаж шинэчлэгдэх вэ гэдэг бидний хамгийн том асуудал болж хувирч байна. Бид Сонгуулийн хууль, Улс төрийн намын хуулиа шинэчлээд улс төрийн намаа шинэчлэх цаг болсон. Хуучин социалист, коммунист системийн улс төрийн намын араг ясыг аваад яваад байгаа. Бүтэц нь тийм. Наад зах нь 20,30 хүн ажил хийгээд 21 аймагт Хэрэг эрхлэх газар ажиллахад жилд тэрбум төгрөгийн зардал гарахаар байна. Нэг үгээр хэлбэл, хуучин нийгмийн бүтцэд таарсан намыг чирч явж байгаа нь үнэхээр хоцрогдож байна. Тиймээс Ардчилсан нам олон нийт рүү гардаг бүтэц хийнэ. Жишээлбэл, түгжрэлийг шийдэх, утаа, ядуурал, ажилгүйдлийг алга болгох бүтцийг нам дээрээ хийнэ. Манай намын шинэчлэлийн хэлэлцүүлэг одоо явж байгаа. Хэлэлцүүлэг гуравдугаар сарын 10-д гэхэд ерөнхий дүр зураг нь гараад ирнэ. Үүний дараа бид бүтэц, зохион байгуулалтын асуудлаа ярина. Түүнтэй холбоотой удирдлагуудын асуудлыг шийднэ” гэсэн юм.
