УИХ-ын чуулганы хуралдаан 10:00 цагт эхэлсэн. Чуулганаар “Олон улсын иргэний нисэхийн тухай Конвенцын 50 дугаар зүйлийн а) хэсэгт нэмэлт, өөрчлөлт оруулах тухай Протокол”-ыг соёрхон батлах тухай хуулийг баталлаа.
Түүнчлэн “Төрийн өмчөөс орон нутгийн өмчид эд хөрөнгө шилжүүлэх тухай "Улсын Их Хурлын тогтоолын төсөл /Засгийн газар 2023.01.19-ний өдөр өргөн мэдүүлсэн, хэлэлцэх эсэх/-ийг хэлэлцэж байна.
Хэлэлцэж буй асуудалтай холбогдуулан УИХ-ын гишүүд асуулт асууж, үг хэлж байна. Мөн үеэр УИХ-ын гишүүн А.Адъяасүрэн өмч хөрөнгийг хуваарилах, орон нутаг руу шилжүүлэх зэрэг жижиг асуудлыг УИХ яриад суух нь буруу гэж шүүмжиллээ. Тэрээр "Төрийн өмчийг орон нутгийн өмчид шилжих болгонд УИХ-аар хэлэлцэж, шийдвэр гаргах гэж цаг зав их барах юм.
Судлаад үзэхэд ингэж хэлэлцэж ирсэн практик 1996 оноос эхэлсэн юм байна. Жишээ нь, Баянхонгор аймагт тавилга эд хогшил, 52 ширхэг ширээ сандлын асуудал, 24 ширхэг ширээ сандал, бүр сүүлдээ хоёрхон ширхэг үл хөдлөхийн асуудлыг бид ярих гээд энд сууж байна. Гэтэл одоо Монгол Улсад бидний хийх ажил зөндөө байна. Жишээ нь, Гэр бүлийн тухай хууль, Боловсролын тухай хууль, Нийгмийн даатгалын багц хуулиуд, Тэтгэврийн тухай гээд маш олон асуудал байхад УИХ дэмий юманд цаг заваа үрэх юм гэж би боддог.
Иймэрхүү жижиг сажиг асуудлыг Засгийн газрын хэмжээнд шийддэг болмоор байна. Энэ асуудлыг одоогийн Төрийн болон орон нутгийн өмчийн тухай хуулийн шинэ төсөлд хэрхэн тусгах вэ? Засгийн газрын хүрээнд хөнгөхөн шийдэх ямар арга шийдэл байна вэ?" гэв.
