УИХ-ын сонгуулийн 18, 28 дугаар тойрог буюу Хэнтий аймаг, Сонгинохайрхан дүүрэгт явуулах нөхөн сонгуулийг ирэх аравдугаар сарын 10-нд явуулахаар парламентаас товлосон. Тус сонгуульд МАН, Үнэн ба зөв нам, Шударга иргэдийн нэгдсэн эвсэл нам, Дэлхийн монголчууд нам, Гэр хороолол хөгжлийн нам, "Зөв хүн-Электорат" эвсэл, АН, Эрх чөлөөг хэрэгжүүлэгч нам, Ард түмний олонхийн засаглал нам, Иргэний зориг ногоон нам оролцохоо илэрхийлж Сонгуулийн ерөнхий хороонд материалаа хүргүүлээд байгаа юм. Эдгээр нам, эвслээс "Зөв хүн-Электорат" эвсэл Сонгуулийн ерөнхий хорооноос батламжаа гардаж авсан талаараа мэдээлэл хийлээ.
"Зөв хүн-Электорат" эвслийг төлөөлж ХҮН-ын ерөнхий нарийн бичгийн дарга, НИТХ-ын төлөөлөгч П.Ганзориг "Эрх баригчдад УИХ-ын нэг суудал дутаагүй. Харин сөрөг хүчний дуу хоолой дутаж байгаа. Тиймээс иргэдийн дуу хоолой болж сонгуульд хүчтэй өрсөлдөх болно. Манай эвсэлд нэр дэвших хүсэлтэй гишүүд бий. Мөн эвслийн гишүүн биш ч нэр дэвших хүсэлтээ илэрхийлсэн хүмүүс байгаа" гэлээ.
