Төрийн ордонд Улс төрийн намын тухай хуулийн шинэчилсэн найруулгын төсөл болон Сонгуулийн тухай хуульд нэмэлт өөрчлөлт оруулах тухай хуулийн төслийн хэлэлцүүлэг болж байна.
Хэлэлцүүлгийн үеэр Иргэдийн оролцооны намын дарга Ц.Оюунгэрэл санал хэллээ.
Тэрбээр "Энэ хуулийг Ерөнхийлөгч, ҮАБЗ-ийн дарга өргөн барьсан гэж үзэхэд бол тангаргаасаа няцсан шинжтэй гэж харж байна. Төрөөс жаахан мөнгө өгөөд намуудын дата баазыг авах гэж байна. Намын дата баазыг нэхэж авдаг, эсвэл мөнгө өгөхгүй гэж хавчдаг НАХЯ-ны шинжтэй байгууллага Сонгуулийн ерөнхий хороо болох нь.
Аюултай бүтцүүдээс, аюултай зүйлсээс намаа хамгаалж чадахгүй мөртлөө, нэгэнт байгуулагдсан намуудаа НАХЯ-ны зарчмаар дэглэх юм байна.
Төрөөс үнэхээр мөнгө өгөх бол өөрийнх нь дансанд биш, гэрээ хийсэн байгууллагууд руу нь өгдөг байх хэрэгтэй. Тэгэхгүй бол намын дансанд мөнгө өгснийхөө хариуд бүх дата мэдээллийг нь шаарддаг болох гээд байна. Намын дансанд төрөөс мөнгө орохыг би эрс эсэргүүцэж байна.
Намын гишүүдийн эрх, үүргийг хуулиар бичиж өгдөг нь илүү зан. Намд намын байгууллагын зөвшөөрлөөр элсэх зохицуулалт байна. Энэ хуучинсаг арга байна. Ийм хуучинсаг аргаар элсүүлэх юм бол хуучинсаг нам нь л дүрэмдээ оруулах хэрэгтэй" гэлээ.
Amlalt.mn
