Улсын их хурлаас НӨАТ-ын баримтыг хэвлэх шаардлагагүй гэж үзэж байгаа. Тэгвэл уг асуудлаар УИХ-ын гишүүн, Инновац, цахим бодлогын байнгын хорооны дарга Э.Батшугар энэ сарын 10-нд Ubn.mn сайтад мэдээлэл өгчээ.
Тэрбээр “Монгол улс "Цахим үндэстэн болно" гэсэн зорилго тавьсан. Үүний хүрээнд хийгдэж байгаа ажил бол энэ ажил.
Ялангуяа төрийн үйлчилгээг ч мөн цаасаар авах шаардлага байгаа юу гэдгийг эргэн харах хэрэгтэй. Үүнд хугацаа зарж байхаар E-Mongolia платформоор үйлчилгээ авах бололцоо нээгдсэн.
Хэрэв НӨАТ-ын QR кодыг хэвлэхгүй, цахимжуулбал улс даяар эхний есөн сарын байдлаар 220-350 сая төгрөгийн цаас хэмнэх боломжтой гэж судалсан. Үүнээс харахад төрийн үйлчилгээг цахимжуулахаас гадна бусад бүхий л бичиг баримтыг цахимжуулж болохоор байна. Энэ нь мэдээж маш их хэмнэлтийг бий болгоно.
НӨАТ-ын баримт бол зөвхөн нэг жишээ. Цаашид бусад төрлийн цаасан үйлчилгээг цахимжуулах бололцоотой болно.
Миний хувьд уг асуудалтай холбоотойгоор Монгол банк болон бусад арилжааны банкууд, банкны холбоод, мөн татварын албатай ярилцаж байж нэгдсэн шийдэлд хүрэх ёстой. Тиймээс ойрын хугацаанд НӨАТ-ын баримтыг цахимжуулах шийдэлд хүрэхээр ажиллаж байна.
УИХ-ын гишүүд бүгд дэмжиж байгаа. Өмнө хэлсэнчлэн цаасан хэрэглээнээс салж, 220-350 сая төгрөг хэмнэх боломжтой учир үүнийг боломж гэж харж байна” гэсэн юм.
