Монгол ардын намын Удирдах зөвлөл хуралдаж, гурван асуудал хэлэлцсэнийг УИХ дахь МАН-ын бүлгийн дарга Д.Тогтохсүрэн мэдэгдлээ.
Тэрбээр “МАН-ын Бага хурлыг товлон зарлах асуудлыг хэлэлцээд 2022 он арванхоёрдугаар сарын 6-ны өдөр хуралдуулахаар шийдэрлэлээ. Бага хурлаар МАН-ын нэг жилийн ажлын тайлан, намын даргын дэвшүүлсэн Шинэ сэргэлтийн бодлогын хэрэгжилтийн үр дүн болон цаг үеийн асуудлыг хэлэлцэнэ.
Зүүн төвийн үзэл баримтлал бүхий намуудын нэгдэл болох СоцИнтернийн удирдлагад МАН-ын гишүүнийг нэр дэвшүүлэх асуудлыг мөн хэлэлцсэн. Ингээд МАН-ын гишүүн Ц.Мөнх-Оргилыг СоцИнтернийн дэд ерөнхийлөгчид нэр дэвшүүлэхийг дэмжиж, шийдвэрлэлээ.
Түүнчлэн Индонезийн Жакарта хотод болох СоцИнтернийн Их хуралд МАН-аас төлөөлөл оролцуулах асуудлыг хэлэлцэн шийдвэрлэсэн.
УИХ-ын дэд даргыг томилох асуудлыг намын бага хурлын дараа хэлэлцэнэ.
Дэд сайд Б.Болор-Эрдэнийг огцруулах эсэх асуудал Удирдах зөвлөлөөр яригдаагүй” гэлээ.
