Боловсролын багц хуулийн төслийн нэгдүгээр хэлэлцүүлэг болсонтой холбоотойгоор англи хэлний хичээлийг нэгдүгээр ангиас заах, эсэх асуудлаар нийгмийн сүлжээнд олон нийтийн дунд маргаан бий болсон. Уг асуудлаар Боловсрол шинжлэх ухааны сайд Л.Энх-Амгалан “Бага ангийн сурагчдын хичээлийн ачаалал нэмэгдсэн. Үзэж байгаа хичээлийн тоо олон, сургалт сонирхолгүй байгааг өөрчлөх шаардлага тулгарсан. Сурагчид шалгалтанд биш амьдралд бэлддэг боловсрол хэрэгтэй байна. Сурагчийг дүнгээр эрэмбэлдэг байдлыг өөрчлөх шаардлага бий болоод байна. Дэлхийн банкны судалгаагаар манай улсад 12-р анги төгссөн хүүхдүүд наймдугаар ангийн боловсролтой байна гэсэн дүн гарсан байна. Авах ёстой мэдлэгийнхээ 30-40 хувийг хүүхдүүд олж авч байна. Тэгэхээр сургалтын хөтөлбөрийг сайжруулах шаардлагатай байна. Сургууль, цэцэрлэгийн удирдлагууд улстөрөөс хамааралтайгаар томилогдож байгаа нь сурагчдын боловсролд нөлөөлж байна. Тэгэхээр сонгон шалгаруулалтаар сонгогдсон мэргэжлийн багш сургуулийн захирал болдог жишиг тогтох ёстой. Боловсролын салбарт цахим шилжилт хэрэгтэй байна. Ингэснээр тухайн хүүхэд хаана амьдарч байгаагаас үл шалтгаалаад сайн багшаар хичээл заалгана.

Англи хэлний хувьд гуравдугаар ангиас нь оруулна. Гэхдээ хувийн сургуулиудыг 3-р ангиас нь заа гэж тулгаж чадахгүй. Харин мэдээлэл, технологийн хичээлийг нэгдүгээр ангиас заана. Үүний тулд хөтөлбөрийн шинэчлэлийг Боловсролын хүрээлэн гаргаж, түүний дагуу хичээл орно. Хувийн сургуулльд хувьсах зардал олгохгүй. Үндэсний хөтөлбөр хэрэгжүүлж байгаа олон улсын сургуулиудад хувьсах зардал олгоно” гэв.

Amlalt.mn