УИХ-ын Төсвийн байнгын хорооны хуралдаанаар Эрчим хүчний сайд Б.Чойжилсүрэнгийн өгрөсөн долоо хоногт өргөн барьсан Аж ахуйн нэгжийн орлогын албан татварын тухай хуульд нэмэлт оруулах тухай болон Гаалийн тариф, гаалийн татварын тухай хуульд нэмэлт, өөрчлөлт оруулах тухай хуулийн төслийг хэлэлцлээ. Уг төслүүдийн агуулга нь цахилгаан эрчим хүчний таван мегаваттаас дээш хүчин чадалтай эсхүл дулааны эрчим хүчний 1.5 мегаваттаас дээш хүчин чадалтай эх үүсвэр барих, суурилагдсан хүчин чадлыг өргөтгөх, тухайн шинэ эх үүсвэрийг цахилгаан дулаан хангамжийн системд холбох шугам болон дагалдах дэд бүтцийн ажлын хүрээнд импортоор оруулах тоног, төхөөрөмжийг гаалийн албан татвараас чөлөөлж, нэмэгдсэн өртгийн албан татвар төлөх хугацааг дөрөв жил хүртэл хугацаагаар сунгах, эсхүл уг татварыг дөрвөн жилийн хугацаанд хэсэгчлэн төлүүлэх юм.
Байнгын хорооны хуралдааны үеэр Ш.Раднаасэд гишүүн "Төрийн өмчит усан цахилгаан станцуудыг үл хөдлөхийн албан татвараас чөлөөлөх тухай хуулийн төслийг УИХ-д өнгөрсөн жил өргөн барьсан. Улирлын чанартай ажилладаг усан цахилгаан станцуудаас үл хөдлөх хөрөнгийн татвар авдаг. Ингэхдээ зөвхөн байшин барилгын татвар биш нийт объектоор нь татвар тогтоодог. Татварын өр хуримтлагдсаар байгаад шүүхээс дансыг нь хаасан тохиолдол гарсан. Тиймээс үл хөдлөхийн албан татвараас чөлөөлөх асуудлыг энэ төсөлтэй хамт хэлэлцмээр байна. Үйлдвэрлэлийн зардлаас нь бага үнээр цахилгааныг худалдан авч байгаа хэрнээ татвараа болохоор ямар хөнгөлөлтгүй тооцож авдаг. Усан цахилгаан станцын нийт байгууламж гэхээр нуур нь орж байгаа. Тийм том талбайг хамруулан үл хөдлөх хөрөнгийн татвар авч байна. Үүнийг татвараас чөлөөлөх хэрэгтэй." гэв.
Amlalt.mn
