Улсын Их хурлын 2024 оны сонгуульд оролцох намууд энэ сарын 20-ны өдөр хуралдаж, 13 тойрогт өрсөлдөх 78, намын жагсаалтын 48 нэр дэвшигчдээ тодруулсан.
Харин өнөөдөр Ардчилсан Намын Үндэсний бодлогын хорооны гишүүдийн төлөөлөл нэр дэвшиж буй зарим хүмүүсийн асуудлаар Сонгуулийн ерөнхий хороонд гомдол гаргана гэж мэдээлэл хийлээ.
Нэр дэвшигчидтэй холбоотой асуудлаар намын гишүүн Д.Сосорбарам "Намын дарга зэрэг хүмүүс тойрогт дэвшиж, өрсөлдөх ёстой. Сэтгэлгээ залуу хүмүүсийг жагсаалтад оруулах нь зөв. Миний бачимдаж байгаа зүйл бол ардчилал буюу эрх чөлөөг Ардчилсан намаар нь устгах явдал гарч байна. Үүнийг гүйцэтгэж байгаа хүн нь Х.Баттулга" гэж ярив.
Мөн ҮБХ-ны гишүүн биш хүмүүс нэр дэвшиж байгаа нь шударга бус, хууль зөрчсөн үйлдэл юм. АН-ын сонгуульд нэр дэвшүүлэх ажилтай холбогдуулан хэд хэдэн зөрчил илэрч байгаагийн нэг нь АН-ын гишүүн, АН-ын ҮБХ-ны гишүүн УИХ-ын сонгуульд АН-ын нэрийн өмнөөс нэр дэвших дүрэмтэй.
Гэтэл АН-аас нэр дэвшүүлж байгаа хүмүүсийн дунд АН-ын гишүүн биш, ҮБХ-ны гишүүн биш хүмүүс олноороо нэр дэвшиж байгааг бид албан ёсоор эсэргүүцэж байна. Энэ талаар сонгуулийн ерөнхий хороонд гомдол гаргаж, УДШ-д өргөдөл гаргаж байна гэдгээ мэдэгдлээ.
Энэ үеэр Х.Баттулга, Л.Мөнхбаясгалан, Н.Алтанхуяг, С.Ганбаатар нар Ардчилсан Намын гишүүн биш. Энэ мэтчилэн дурдвал 30 гаруй хүний ийм зөрчилтэй асуудал байна. Эдгээр хүний хэзээ намд элссэн, баталгаажуулсан баримт байдаггүй. Барууны үзэл баримтлалтай Ардчилсан Нам сонгуульд нэр дэвшигчдээ шударга зарчмаар сонгох хэрэгтэй гэж анхааруулав.
Б.БАЯРМАА
