Монгол Улсын Засгийн Газрын 2023 оны 11 дүгээр 15-ны өдрийн 46 дугаар тэмдэглэлд бүх нийтийн цахим ур чадварыг дээшлүүлэх арга хэмжээг улсын хэмжээнд зохион байгуулахыг Цахим хөгжил, харилцаа холбооны сайд болон Засгийн газрын Хэрэг эрхлэх газарт тус тус үүрэг болгосон.
Дээрх бодлогын баримт бичгийн хэрэгжилтийн хүрээнд "И-Монгол академи" УТҮГ-аас Цахим ур чадварын үндэсний аяныг бүх нийтийн цахим ур чадварыг дээшлүүлж, тоон хуваагдлыг бууруулан цахим шилжилтийн бэлэн байдлыг хангах зорилгоор Нийслэлийн 9 дүүрэгт 2024 оны 04 дүгээр сарын сарын 01-ээс 07 дугаар сарын 10-ны хооронд зохион байгуулан ажиллаж байгаа билээ.
Тус аяны хүрээнд "И-Монгол академи" УТҮГ-ын Цахим ур чадварын газраас Чингис хаан Үндэсний музейтэй хамтран 5-р сарын 17-ны өдөр цахим ур чадварын сургалтыг 18-25 насны залуучуудад зохион байгуулав.
Сургалтаар цахим орчин дахь аюулгүй байдал, цахим гэмт хэргээс урьдчилан сэргийлэх, мэдээллийн аюулгүй байдлын зөвлөмж, хувь хүний хөгжил болон манлайлах ур чадвар, оюутан залуусын Next Gen Club-ийн санаачилгаар E-Mongolia платформ дээр оюутан цэс болон оюутны цахим картыг үүсгэсэн талаарх агуулгын хүрээнд мэдлэг ойлголоо нэмэгдүүллээ.
E-Student нь Монгол улсад үйл ажиллагаагаа явуулж буй 63 их дээд сургуулийн 145,000 гаруй оюутнууд нэгдсэн цахим карттай болсноор төрийн үйлчилгээг авахад илүү амар болохоос гадна хуурамч диплом, сургуулийн болон дүнгийн тодорхойлолтыг хуурамчаар үйлдэх зэрэг олон асуудлыг цогцоор шийдэх боломжтой болсон аж.
