Хүүхэд хамгааллын “E-Kids” үйлчилгээний шинэчлэл, Эх хүүхдийн эрүүл мэндийн дэвтэр, жирэмсэн эхийн тэтгэмж, цалинтай ээж хөтөлбөр, насны хишигт хамрагдах хүсэлт илгээх зэрэг үйлчилгээнүүд цахимжиж байгаа талаар Цахим хөгжил, харилцаа холбооны сайд Н.Учрал өнөөдөр /2024.06.06/ танилцуулав.
Шинэчлэгдсэн “E-KIDS” үр хүүхдүүдээ цахим гэмт хэргээс сэргийлэх, гэр бүлээ технологиор хамгаалахад тусална.
Хүүхэд хамгаалагч “E-KIDS” ийн шинэ шийдлүүд: Эцэг эхдээ байршлаа илгээх, чаатлах, зохисгүй контентоос хамгаалах, цагдаад гомдол гаргах, бүх сурах бичиг, зөвхөн хүүхдэд зориулсан үндэсний сошиал платформоор харилцдаг болж байна.
Цахим хөгжил, харилцаа холбооны сайд Н.Учрал хүүхэд хамгааллын “E-Kids” платформын ач холбогдлын талаар мэдээлэл өглөө.
Тэрбээр “Судалгаагаар 10 хүүхэд тутмын 9 нь цахим хүчирхийлэлд өртөж байна. 2023 онд гэхэд хүүхэдтэй холбоотой 3430 гэмт хэрэг үйлдэгдсэн байсан. Цахим гадуурхал, хүчирхийлэлд өртсөн тохиолдол 60 гаруй хувийг эзэлж байна. Тиймээс хүүхдүүд заавал фейсбүүкт нэвтрэхгүйгээр хүүхэд хамгааллын E-Кids -д өөрийн profile хаягаа нээснээр ээж аавдаа сургуульдаа очсон, гэртээ ирлээ гэсэн байршлаа илгээхээс гадна, багш, ангийн хүүхдүүдтэйгээ чатлах боломжтой.
Эцэг эхийнхээ хяналт нь дор 18 хүртэлх насны хүүхдүүд Монгол хэл дээр ашиглах боломжийг бүрдүүлсэн. Хүүхэд хамгааллын “E-Kids” платформыг датагүй байсан ч ашиглах боломжтой ”гэлээ.
