УИХ дахь Ардчилсан намын бүлгийн дарга, УИХ-ын гишүүн О.Цогтгэрэл намын даргад өрсөлдөх хүсэлтээ албан ёсоор өглөө.Тэрбээр хүсэлтээ өгснийхөө дараа мэдээлэл хийж, байр сууриа илэрхийллээ.

УИХ-ын гишүүн О.Цогтгэрэл: Миний хувьд Ардчилсан намын гишүүнээр элсээд 25 жил, АН-ын ҮБХ-ны гишүүнээр сонгогдоод 10 жил, АН-ын УТЗ-ийн гишүүнээр сонгогдоод найман жил болж байна. Мөн сүүлийн хоёр парламент дамжин УИХ дахь АН-ын бүлгийн даргаар ажиллаж байна.

2015 онд дунд шатанд буюу аймгийн намын даргаар ажиллаж байсан зэргээр АН-ын бүхий л шатанд нь ажиллаж ирсэн бүтээгдэхүүн гэдгээ тодотгож хэлье.

Ардчилсан намын даргын сонгууль, сунгаанд цаашид Ардчилсан нам төрийн сонгуульд амжилттай оролцохын тулд, төрийн сонгуульд ялсан тохиолдолд цаашид юу хийх юм бэ гэдэг бодлогоо танилцуулах ёстой.

Тиймээс “ШИНЭ МОНГОЛОО ЦУГ БҮТЭЭНЭ” гэдгээ мөрийн хөтөлбөртөө тусгалаа. Монголоо шинээр харах ёстой, АН-аа шинэчлэх ёстой.

Монгол Улсын хөгжил дэвшлийн өмнө тулгамдаад байгаа хууль эрх зүй, эдийн засаг, улс төрийн гэх мэт бүх салбарт шинэчлэл өөрчлөлт хийх шаардлага байна. Улс орноо шинэ шатанд гаргах шаардлага байна. Үүнийг магадгүй ганцхан Арчилсан нам хийж чадна гэдэгт эргэлздэггүй.

АН баруун төвийн буюу хувь хүний эрх, эрх чөлөө, хувийн өмчийг дээдэлсэн төрийн бага оролцоог эрхэмлэдэг намын хувьд АН ялсан шиг ялж, засагласан шиг засаглах хэрэгцээ шаардлага тулж ирээд байна.

Энэ бүхнийг өөрчилж өөрийнхөө өнгө төрх, үзэл санааг тодотгож гарах шаардлагатай ийм цаг үед ардчилсан нам 35 жилийнхээ ой дээр зогсож байна. Тийм учраас Шинэ Монголоо өөрчлөх алхмыг шинэчлэгдсэн АН-ынхан хийж чадна.