Авлига, албан тушаалын гэмт хэрэгт холбогдсон этгээдүүдийн хөрөнгийг хураах ажлыг эхлүүлнэ гэж Ерөнхий сайд Г.Занданшатар өнгөрсөн долоо хоногт мэдэгдсэн. Хүлээлт үүсгэв. Айдас төрүүлэв. Зарим нэгэнд улс төрийн “оноо” цуглуулах завшаан болов. Үндсэн хуулинд заасанчлан шударгаар хөрөнгөтэй болох эрхээ эдэлсэн хэн бүхэнд хамааралгүй нь ойлгомжтой. Тэд хүлээж байна.

Шударга бусаар, авлига, албан тушаал, эрх мэдлээ ашиглан хөрөнгөтэй болсон “нөхдүүд”ийн хөрөнгийг хураана гэж эргэлт буцалтгүй шийдсэн бололтой. Тэд харин айдастай байна. Төр иргэдийнхээ өмчийг хураах биш өөрийн мэдлийн өмч хөрөнгөө хураан авч, үнэлж цэгнэн, бүртгэлжүүлж, зах зээлийн эргэлтэд оруулах ажлыг эхлүүлнэ гэж байна. Угтаа хөрөнгө (хэн нэгний) биш хөрөнгөө (өөрийн) хураах гэж л шийдэж. Тийм учраас “авлига, албан тушаалын гэмт хэрэгт холбогдсон этгээдүүд”-ийн хэмээн тодотгосон биз.

Ерөнхий сайд бүртгэл тайлан нь нэгдмэл бус, тархай бутархай байсан мэдээллүүдийг нэгтгэж, цэгцлэх үүрэг өгч, татан буугдсан болон эрсдэлд ороод байгаа банкуудад байршиж байсан төрийн хөрөнгийг буцаан төвлөрүүлж, төрийг хохиролгүй болгох үүрэг, чиглэл бүхий ажлын хэсгийг Төрийн өмчийн бодлого, зохицуулалтын газрын даргаар ахлуулан байгуулсан. Үр дүн гарч эхэлж байна. Газрын хэвлийн баялгаа Үндсэн хуулийн үзэл баримтлалдаа нийцүүлэн төр мэдэлдээ авч эхэллээ. Тухайлбал “Төгрөг нуурын” гэх бүлэг ордыг төрийн мэдэлд авснаар иргэдийн “Баялгийн сан”-гаас хүртэх өгөөж нэмэгдэх нь дамжиггүй. Ер нь төр татан буугдсан болон үйл ажиллагаа нь доголдсон гурван банкнаас нийт 483 тэрбум төгрөгийн авлагатай. Мөн Хөгжлийн банкны 27 зээлдэгчийн 1,3 их наяд төгрөгийн чанаргүй зээлийн өр, авлага бас байгаа аж.
Энэ бүх хөрөнгийг бүртгэн үнэлгээ хийж, дуудлага худалдаанд оруулах, шүүхийн шийдвэрээр өрийг нь төлүүлэх, банкны өрөнд ирсэн баригдаж дуусаагүй барилгуудад дахин үнэлгээ хийж, бонд, үнэт цаасаар дамжуулан төрд шилжүүлэх зэрэг олон арга замаар өмчөө үнэ цэнийг нь өсгөж, үр ашгийг нь арвижуулан хурааж хумих бололтой. Төр төмөр нүүрээ харуулж, төр түмний хөрөнгийг цэгцлэх цаг болсон.

Б.Баяр

Өнөөдөр сонин