Үе, үеийн Засгийн газрын бодлого сайн, муутайгаа Ерөнхий сайдаараа “овоглогдож” үлддэг. С.Баярын “Атарын II аян”, “Оюутолгойн гэрээ”, С.Батболдын “Эх орны хишиг”, Н.Алтанхуягийн “Эзэн-100”, Ч.Сайханбилэгийн эдийн засгийн реформууд, У.Хүрэлсүхийн “Баялгийн сан”, Л.Оюун-Эрдэнийн “Иш ажиллагаа… гэх мэтчилэн.
Зургадугаар сард Гүйцэтгэх засаглалын тэргүүнээр томилогдсон Г.Занданшатар зуун хоног дээрээ 10 цогц гол бодлогоо зарласан нь “Шинэ итгэл-эрс шинэтгэл”. Сүржин биш бас даржин биш ердийн тодорхойлолт. Улс төр, эдийн засагт, иргэдэд итгэл найдвар хэрэгтэй цагт оновчтой нэршил. Мэдээж амлахаасаа хэрэгжүүлэх нь хэцүү. Авчиг ажил хийвэл дуусгах ёстой.
- Хүний хөгжлийн реформ
- Засаглалын реформ
- Эдийн засгийн бүтцийн шинэчлэл
- Татварын шинэчлэл
- Цахим шинэчлэл
- Ногоон хөгжил
- Эрчим хүчний шинэчлэл
- Хот, хөдөөгийн хөгжлийн шинэчлэл
- ХАА-н шинэчлэл
- Үндэсний нэгдэл, үнэт зүйл
БОДИТ ТОО!
Г.Занданшатарын засгийн ажил, Ерөнхий сайдынх нь замд нүх ухаж, дэгээ тавьж яваа нь МАН-ынхан. Ямартай ч 2024 оны сүүлээс огцом унасан нүүрсний экспортыг нэмэгдүүлж, инфляцийн өсөлтийг саармагжуулж чадсан. Л.Оюун-Эрдэнийг тамгаа хүлээлцэх үед Монголын эдийн засгийн өсөлт 2.4 хувь болж унасан, төгрөгийн ханш 3600 давж суларсан, төсвийн орлого 3.6 их наядаар тасарч инфляци 15 хувьд хүрэх эрсдэл үүссэн байв.
Тэгвэл Г.Занданшатарын зуун хоногийн сайн мэдээ нь “Эрдэнэс Тавантолгой”-д онцгой дэглэм тогтоосноор ердөө хоёрхон сарын дотор нүүрсний олборлолт 1.6 дахин өсчээ. Эдийн засгийн өсөлт 2.4 хувиас 5.2 хувь болж өссөн байна. Ард иргэд, аж ахуйн нэгжийн бүсийг чангалахаас илүү төр бүсээ чангалж, төсөвт хэмнэлтийн тодотгол хийснээр 2.2 их наядыг хэмнэжээ. Гэх мэтчилэн.
Л.Оюун-Эрдэнийн Засгийн газрын үед улсын төсвийн зарлага 13 их наядаас 35 их наяд болж нэмэгдсэн. Харамсалтай нь, улсын төсөв “таргалсан”, аж ахуйн нэгжийн дампуурсан яг тэнцсэн.
Үе, үеийн Засгийн газар төрийг цомхотгоно гэж наанаа ярьдаг ч цаанаа төрийн өмчийг нэмэгдүүлж, төрийн албыг данхайлгаж ирсэн нь бодит факт. Л.Оюун-Эрдэнийн Засгийн үед төр “баяжсан”, хувийн хэвшил ядуурсан. Төрийн баяжихийн хэрээр хулгай, луйвар, авлига цэцэглэдэг. Тиймээс төрийн авлига, хулгайтай тэмцье гэвэл төрийн албыг цомхотгож, төрийн өмчийг цөөлөх юм.
Г.Занданшатарын Засгийн газар уялдаа холбоогүй 29 Үндэсний хороо, зөвлөлийг татан буулгаж, төрийн өмчит компаниудын удирдлагын орон тоог 200-аар цөөлжээ. Дарга нарын тоо цөөрнө гэдэг авлига, хулгайчдын тоо буурна гэсэн үг.
РЕФОРМ 10: ҮНДЭСНИЙ НЭГДЭЛ БА ҮНЭТ ЗҮЙЛ
Г.Занданшатарын 10 цогц реформын хамгийн чухал нь үндэсний эв нэгдэл. Өнгөрсөн арван жил гадаадын дайснаас илүү дотоодын авлига, хулгай Монголын гол дайсан болсон. Монгол хүний гараар Монголыг хорлодог улс төр төрийн ордонд ч, төв талбайд ч өрнөдөг болсон.
Түүний өмнөх Ерөнхий сайд ямарч өрсөлдөөнгүйгээр Засгийн тамгыг “өвлөн” авсан. У.Хүрэлсүхийн “машид итгэн үлдээсэн- МАН-ын тамгыг дүү нар нь мафийн загалсайлсан эцэгт зарж идсэн нь өнөөдрийн улс төрд зовлон, эдийн засагт хямрал авчирсан. Үндсэндээ, өнөөдөр Монголд “Монгол ялна” улс төр зохихгүй, бүр хэрэггүй. Хэт уянгалсан, хэлбэр хөөсөн улс төрөөс, херопагандагаас нийгэм залхсан
Газарзүйн байрлалын хувьд албан бус эдийн засгийн “хоригтой”, автократ дэглэмтэй, нэг нь гаднаа газар нутгийн дайн байлдаантай, нөгөө нь эдийн засгийн зөрчилдөөнтэй хоёр том гүрний дунд орших Монгол Улсад “анти-чайна” ба “анти-ороZ” улс төрийн аль нь ч хэрэггүй. Үндэстнээ хуваасан, баян-ядуугаар нь талцуулсан ПиАр бүр ч хэрэггүй. Олзуурхууштай нь Г.Занданшатарын 100 хоногт Монгол Улс энэ бүгдээс хол байлаа.
Г.Занданшатарын хувьд Ерөнхий сайдын суудлыг өвлөж биш өрсөлдөж авсан. Эзэмшсэн боловсрол, уншсан ном улс төрийн туршлагаараа тэр наяад оны залуусын урд гишгэнэ үү гэхээс хойно үлдэхгүй. Хувь хүний зан характер зөөлөн талдаа. Тиймээс улс төр-эдийн засагт “SOFT POWER” бодлого хэрэгжүүлж буй нь үг-үйлдлээс нь харагддаг, уншигддаг. Ямар ч байсан МАН-ын дайсантай нэгдэж намаа, Монголын дайсантай хамтарч улсаа хорлохгүй.
ҮНДЭСНИЙ НЭГДЭЛ БА ҮНЭТ ЗҮЙЛгүй улс төр улс орноо хорлодог, улсаа нураадгийн гашуун сургамжийг монголчууд өнгөрсөн арваад жил хангалттай мэдэрсэн, амссан. Үнэт зүйлгүй улстөрчид зөвхөн өнгө мөнгө, эрх мэдэл, эрх ашиг дээр хэрхэн “эвцэлддэг”-ийг өнөөдрийн улс төрөөс ч харж болно.
Тиймээс урьд өмнө нь хэн ч хэзээ ч хэлж байгаагүй реформ 10-аас Г.Занданшатарын эрс шинэтгэл эхлэж байж улс орон зөв гольдролдоо орно. Үнэт зүйл насаар хэмжигддэггүй. Үнэт зүйл хувь хүний итгэл үнэмшил, боловсрол, уншсан дуулсантай ч холбоотой.
Монголд “салхин тээрэм”-тэй байлддаг Ерөнхий сайд биш салхин тээрэм байгуулдаг Ерөнхий сайд хэрэгтэй байна!
Эх сурвалж:News.mn
