Улс төрийн намын тухай хуулийн хүрээнд энэ оны 12 сарын 31-ны өдөрт багтаан Улс төрийн намууд Намын их хурлаа хийж, дүрмээ шинэчлэн баталж, Улсын дээд шүүхэд бүртгүүлэх ёстой. Энэ дагуу парламентад суудалтай МАН, АН Их хурлаа хуралдуулж, намын дүрмээ намын гишүүдээрээ хэлэлцүүлэн, Намын дарга нараа шинэчлэн баталж Улсын дээд шүүхэд бүртгүүлэхээр өгөөд байгаа.
Тэгвэл парламентад суудалтай ИЗНН өмнө нь 9 сард Намынхаа их хурлыг хуралдууулсан ч намын гишүүдийн дэмжлэгийг аваагүй, намынаа Үндсэн дүрмийн хороо, Үндэсний хороо, Улс төрийн зөвлөлийн гишүүнээрээ өөрийн хамаарал бүхий этгээдүүдийг сонгосон, намынхаа анхан дунд шатны төлөөллийг дээрх намынхаа Удирдах албанд томилуулаагүй гэх шалтгааны улмаас Их хурлаа хаалгүй орхисон бол өнөөдөр ИЗНН-ын дарга, УИХ-ын гишүүн Батын Батбаатар өнөөх л өөрийн хамаатан садан, хамаарал бүхий хүмүүсээс бүрдүүлсэн Намынхаа Их хурлыг өнөөдөр /2025.11.30/ Төрийн ордонд 13:00 цагаас нууцхан, цомхон байдлаар зохион байгуулахаар зарлажээ.
Түүнээс өмнө ИЗНН-ын Нийслэлийн хороо санаачлан өнөөдөр ИЗНН-ын Анхан болон Дунд шатны байгууллагуудын 70 гаруй төлөөллөгчдийг хамруулсан хурлыг Пума империал зочид буудлын Хурлын танхимд өнөөдөр /2025.11.30/ зарлан хуралдууллаа.
Тус хуралд ИЗНН-аас намын нэрсийн жагсаалтаар сонгогдон УИХ-ын гишүүн болсон Р.Батболд, М.Нарантуяа-Нара нар хүрэлцэн ирж, намынха гишүүдтэй уулзан, нээлттэй ярилцаж, санал бодлыг нь сонссон бол мөн Ховд, Өвөрхангай, Архангай, Сүхбаатар, Хэнтий зэрэг аймгаас Намын Их хурлын төлөөлөгчид хүрэлцэн ирсэн ч ИЗНН-ын дарга Б.Батбаатарын Төрийн ордонд зохион байгуулж буй "хайрцаглагдсан" хуралд бус, намынхаа анхан шатныхаа хуралд оролцохоо илэрхийлж намын дарга Б.Батбаатарын увайгүй үйлдлүүдийг эсэргүүцэж дуу хоолойгоо нэгтгэжээ.
Тус хурлын зохион байгуулсан ИЗНН-ын Нийслэлийн намын хорооны дарга М.Амартунгалаг, ИЗНН-ын Тэргүүн Дэд дарга С.Батбаатар, ИЗНН-ын Бодлого хариуцсан дэд дарга Т.Бат-Эрдэнэ нар "ИЗНН-ын дарга Б.Батбаатар нь энэ намыг зөвхөн хувийн ашиг сонирхолд үйлчлүүлэхийг зорилгоо болгож, намын Удирдах албан тушаалтнуудыг өөрийн ах дүүс, хамаатан садан, найз нөхдөөрөө хүрээлүүлсэн, намын санхүүжилтийн мэдээллийг нуусан, зориулалтын бусаар зарцуулсан тухай мэдээллийг танилцуулж, хурлын төлөөлөгчдийн санал бодлыг сонсож, гурван удаа Дээд шүүхээс буцаад байгаа намын дүрмийн өөрчлөлтийг хэрхэн хийх талаар төсөл танилцуулж" хэлэлцүүллээ.
Мөн хурлын төсгөлд Төрийн ордонд "ИЗНН-ын Их хурал" нэртэй хамаатан саднаа цуглуулан хуралдаж буй намын дарга Б.Батбаатар хандан хоёр зүйл бүхий шаардлага хүргүүлэхээр тогтжээ.
Уг шаардлагад:
1. ИЗНН-ын дарга Батын Батбаатар намынхаа Анхан болон дунд шатны төлөөлөлийг бүрэн оролцуулсан Их хурлаа намын дүрмийн дагуу зарлан хуралдуулж, тэдэн дунд намын дүрмийн төслөө танилцуулж, санал бодлыг нь тусгах байдлаар намын дүрмийг шинэчлэх
2. ИЗНН-д сонгогчдийн саналын тооны дагуу төрөөс санхүүжүүлсэн өгсөн 455,4 сая төгрөгийн санхүүжилтийн зарцуулалтын тайланг намын гишүүдэд нээлттэй танилцуулах гэсэн хоёр шаардлагыг тавьж байгаа бөгөөд ИЗНН-ын дарга Б.Батбаатар намынхаа анхан болон дунд шатны 70 гаруй төлөөлөгч хурлаас гарсан дээрх шаардлагыг эс биелүүлвэл түүнийг огцруулах хүртэл намын дүрмэнд заасан арга хэмжээг үе шат дараатайгаар хэрэгжүүлэх болсноо зарлажээ.
Ц.Мөнх
Амлалт.мн
