Ерөнхий сайд Г.Занданшатар Засгийн газрын хуралдаан дээр “төрд нүүрлэсэн хулгайтай эвлэрэхгүй” гэдгээ хэлж, “төрийн байгууллагатай хийж байгаа элдэв шахаа, борлуулалт, гэрээний үр ашгийг сайжруулах талаар бодитой алхам хийж, мэдээллийг ил тод явуулдаг болох ажлыг үе шаттай хийх чиглэл”-ийг сайдууд өгсөн.
Тэгвэл Ерөнхий сайд таны дэргэд, танай танхимын нэг гишүүн болох БОУАӨ-ийн сайд Б.Батбаатар татвар төлөгчдийн мөнгийг үр дүнгүй зарцуулж, төрийн хэмнэлтийг хууль зөрчиж байгаа тухай мэдээллийг бид энэ удаад хүргэж байна.
Ирэх жил Улаанбаатар хотноо зохион байгуулагдах Нэгдсэн Үндэстний Байгууллага (НҮБ)-ын Цөлжилттэй Тэмцэх Конвенцийн Талуудын 17 дугаар бага хурлын (COP17) бэлтгэл ажлыг хангах чиглэлээр слбар хариуцсан сайдын хувьд БОУАӨ-ийн сайд Б.Батбаатар гадаад улс орнуудад зочлох, хурал зөвлөгөөнд оролцох, дуу хоолойгоо хүргэх нь буруу биш боловч ингэж явах бүрдээ үргүй зардлууд их хэмжээгээр гаргаж байгаа мэдээллийг хүргэе.
Танилцуулга, бусад материал бэлтгэх, хэвлэх зардал, видео контент хийх нэрээр БОУАӨ-ийн сайд Б.Батбаатар зорьж очсон улс болгондоо их хэмжээний зардал гаргаж байгааг та бүхэнд баримттайгаар танилцуулья.
Интернэт, хиймэл оюун ухаан, цахим ертөнц хөгжсөн энэ цаг үед боршуур, хэвлэмэл хуудас, ном товхимол хэдэн зуун мянгаар нь хэвлээд онгоцоор аваад явдаггүй л юм бол ямар юмных нь танилцуулга, тараах материалын зардал байх вэ, дээр нь бас нэг сайн видео шторк хийлгээд тэрнийгээ улс орнуудад үзүүлж болох атал аль нэг улс руу явах бүрдээ видео шторкны зардал нэрээр байнгын 10-60 сая төгрөгийн зардал гаргаснаа Б.Батбаатар сайд та тайлбарлана уу?
Эсвэл ийм нэрээр төрөөс зардал гаргаад түүнийгээ өөр зорилгоор ашигладаг юм биш биз гэсэн хардлага ч төрж байна.
Түүгээр зогсохгүй зарим зардлыг яамныхаа мэргэжилтний хувийн эзэмшлийн байгууллагын данс руу шилжүүлээд тэндээсээ гаргаж авсан байх магадлалтай ноцтой баримт бидэнд ирсэн. Энэ тухай дараагийн удаад нийтлэх болно.
Ямартай ч БОУАӨ-ийн сайд Б.Батбаатар сайд төрийн хэмнэлтийн хуулийг уландаа гишгэж, ийм ойлгомжгүй байдлаар зардал гаргаж байгааг Ерөнхий сайд Г.Занданшатар, ЗГХЭГ-ын дарга С.Бямбацогт сайд та бүхэн анхааралдаа авч, нягтлан шалгаж, хариуцлага тооцно биз ээ.
Ц.Мөнх
Amlalt.mn
