Нийслэлийн Чингэлтэй дүүргийн 327 дугаар цэцэрлэг нь 3 дахь жилдээ үйл ажиллагаагаа явуулж байна.

Тус цэцэрлэгийн "Хүүхдийн хоолны шим тэжээлийг ясны шөлөөр баяжуулан кальцийн агууламжийг нэмэгдүүлсэн нь" сэдэвт сайн туршлагыг түгээн дэлгэрүүлэх ажлыг 2026 оны 04 дүгээр сарын 15-ны өдөр зохион байгууллаа.

Үйл ажиллагаанд нийслэлийн 9 дүүргийн хоол зүйч, тогооч нар хамрагдлаа.

Нийслэлийн 327 дугаар цэцэрлэг нь хоол үйлдвэрлэл үйлчилгээний чанар хүртээмжийг сайжруулах зорилгоор дараах арга хэмжээг авч хэрэгжүүлсэн байна. Үүнд:

Булууны яснаас гарган авсан шөлийг тухайн өдрийнхөө бүх хоол, хүнсний бүтээгдэхүүн үйлдвэрлэлд хүргэн ашигладаг.

Ясны шөлийг 40:60 харьцаатай шингэлэн 200-250 мг хэмжээтэйгээр хүүхдүүдэд өгч хэвшсэн. Бууцай, шар хулуу, цэцэгт байцаа зэрэг 10 гаруй нэр төрлийн нарийн ногоог шим тэжээлийг нь алдагдуулахгүйгээр хагас боловсруулан гүн хөлдөөж, бэлдэц бэлтгэдэг. Хүрэн манжин, шар хулуу, бууцайг цагаан гаа, нимбэг, зөгийн балаар амтлан төрөл бүрийн дархлаа дэмжих амтат цайг бэлтгэн олгодог. Бууз, банш, цуйван, талх мантуу зэрэг бүтээгдэхүүнийг урьдчилан бэлтгэсэн ногоогоор баяжуулж ясны шөлөөр бэлтгэдэг нь хоолны шим тэжээлийн агууламжийг баяжуулж, хүүхдийн хоол идэх дур, сонирхлыг дээшлүүлдэг байна.

Ясны шөл, нарийн ногоогоор баяжуулсан технологийн карт, цэс боловсруулж, нийт 199 төрлийн хоол, хүнсний бүтээгдэхүүнээр энэ хичээлийн жилд хоол үйлдвэрлэл, үйлчилгээг зохион байгуулж буй туршлагаа хуваалцлаа.

ГАРСАН ҮР ДҮН:

Шүдний өвчлөл мэдэгдэхүйц буурсан: 2025 онд хүүхдүүдийн 60.6% нь шүдний цооролтой байсан бол 2026 онд 42.2% болж, өмнөх онтой харьцуулахад 18.4%-аар буурсан;

Томуу, томуу төст өвчлөл багассан: Хүүхдийн өвчлөлийн байдал өмнөх оны бүртгэлээр дунджаар 34%-тай байсан бол 2026 онд нь 29% болж, 5%-аар буурсан;

Жин болон эрдсийн дутагдал буурсан: Хүүхдүүдийн жингийн дутлыг авч үзвэл өмнөх оны мөн үеэс 1.4%-аар буурсан байна;

Багш ажилчид хоолны мөнгөө төвлөрүүлэн цэцэрлэгийн хүүхэдтэй ижил хоолны үйлчилгээнд хамрагдсанаар эрүүл мэндийн байдал сайжирч, өвчлөл буурсан талаар цэцэрлэгийн эрхлэгч яриандаа дурдав.

Хүүхдийн эрүүл мэнд, дархлааг дэмжсэн шим тэжээллэг хоол хүнсний шинэлэг менежмент, туршлагыг амжилттай нэвтрүүлж, хүүхдийн өсөлт хөгжилт, гэрэлт ирээдүйн төлөө сэтгэл зүрхээ зориулж буй тус цэцэрлэгийн хоол зүйч, эмч, нийт хамт олны нөр их хөдөлмөр, хичээл зүтгэлд талархал илэрхийлье.