Монгол Улсын Ерөнхийлөгч У.Хүрэлсүхийн урилгаар Бүгд Найрамдах Узбекистан Улсын Ерөнхийлөгч Шавкат Мирзиёевийн Монгол Улсад хийсэн Төрийн айлчлалын хүрээнд хоёр орны өсвөрийн боксчдын хамтарсан бэлтгэл сургуулилалтыг Ташкент хотод амжилттай зохион байгууллаа.
Уг бэлтгэлийн эхний үе өнгөрсөн оны зургаадугаар сарын 24-30-нд Спортын төв ордон болон “Их тамир олимп” цогцолборт, хоёр дахь үе долоодугаар сарын 1-14-ний өдрүүдэд “Их тамир олимп” цогцолборт нийт 50 хүний бүрэлдэхүүнтэй зохион байгуулсан юм. Улмаар Спортын төв ордны “А” танхимд 2025 оны долоодугаар сарын 1-6-нд Ардын багш, гавьяат дасгалжуулагч Д.Бандийн нэрэмжит бага насны боксчдын “Олимпын гараа” тэмцээн болсон бөгөөд тус тэмцээний үеэр Монгол, Узбекистаны өсвөрийн тамирчдын нөхөрсөг тэмцээнийг зохион байгуулсан билээ.
Тэгвэл 2026 онд дээрх айлчлалын хүрээнд Монгол Улсын Ерөнхийлөгчийн Биеийн тамир, спортын зөвлөх Ш.Амарсайханы удирдлага дор Монгол Улсын өсвөрийн 14 тамирчин, хоёр дасгалжуулагчийн хамт Узбекистаны Ташкент хотод дөрөвдүгээр сарын 22-ноос эхлэн олимп, дэлхийн хошой аварга, Азийн гурван удаагийн аварга Баходир Джалоловын нэрэмжит боксын төрөлжсөн сургуульд 10 хоног хамтарсан бэлтгэл сургуулилалт хийлээ.
Хамтарсан бэлтгэл эхнээсээ үр дүнгээ өгч тус улсад болж буй боксын өсвөрийн ААШТ-ээс манай зургаан тамирчин хүрэл медалийн болзол хангаад байна. Тодруулбал, хөвгүүдийн 49 кг-ын жинд Т.Кайсар, 50 кг-д Ө.Сүлд, 63 кг-д Б.Баттэмүүлэн, охидын 48 кг-д А.Мөнгөнзул, 50 кг-д З.Аминхайр, 57 кг-д Ч.Дагиймаа нарын тамирчид мөнгөн медалийн төлөө тулалдахаар шалгарлаа. Өсвөрийн боксчдын ААШТ энэ сарын 15-нд өндөрлөж, аваргуудаа тодруулна.
Эх сурвалж: Motsame.mn
