Монгол Улс, БНЭУ-ын хооронд 2019 онд байгуулсан санамж бичгийг шинэчлэн, тодорхой ажил төлөвлөж, үр дүнтэй хамтран ажиллах, салбарын төрийн албан хаагчдыг чадавхжуулах сургалт явуулах, хоршооллын салбарт харилцан ашигтай, хамтын ажиллагааг өргөжүүлнэ.
Энэ талаар ХХААХҮ-ийн сайд Ц.Идэрбат БНЭУ-аас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурвег хүлээн авч уулзах үеэрээ тохиролцсоныг ХХААХҮЯ мэдээлэв.
Сайд Ц.Идэрбат Монгол, Энэтхэг хоёр улс 1955 онд дипломат харилцаа тогтоосон ч шашин, соёлын хоёр мянга гаруй жилийн уламжлалт харилцаа, хэлхээ холбоотой, хамтын ажиллагаагаа стратегийн түвшинд хөгжүүлээд 71 жил болж буйг онцлов. Мөн хоёр улсын харилцаа, хамтын ажиллагааг эдийн засгийн агуулгаар баяжуулах, хүнс, хөдөө аж ахуй, хөнгөн үйлдвэрийн салбарт бүх талаар хамтран ажиллах боломжтой гэдгийг тэмдэглэлээ.
Тухайлбал, сайн жишиг болсон Энэтхэгийн хөдөө аж ахуйн хоршооллын туршлагыг судлах, хоёр улсын ЖДҮ-ийн хамтын ажиллагааг өргөжүүлэх, Монгол Улсаас хөдөө аж ахуйн органик бүтээгдэхүүн экспортлох, төрийн албан хаагчдыг сургах талаар санал солилцсон байна.
Элчин сайд Атул Малхари Готсурве Монгол, Энэтхэг хоёр улс хөдөө аж ахуй, хөнгөн үйлдвэрийн салбарт хамтын ажиллагааг хөгжүүлэх, газар тариалангийн салбарт хамтарсан судалгаа хийх зэрэг саналаа илэрхийлжээ.
Эх сурвалж: Montsame.mn
