Багахангай-Хөшигийн хөндий-Эмээлт чиглэлийн төмөр замын төслийн бүтээн байгуулалт төлөвлөгөөний дагуу, эрчимтэй үргэлжилж байгааг ЗТЯ мэдээлэв.
Төслийн хүрээнд доод, дээд бүтцийн ажил, гүүрийн байгууламж, бараа материалын татан авалтаас гадна гүйцэтгэгч аж ахуйн нэгжүүд талбайн гарц, түр зам байгуулах, хөрс хуулах, ухмал болон далангийн ажил хийж байна.
Тээврийн хэрэгслийн хөдөлгөөнд саад учруулахгүй байх үүднээс ухмалын хажуу налууг 1:1.5 харьцаатай, 8 метр өндөр, 4 метрийн тавцантай төлөвлөж, инженерийн нарийвчилсан зураг төслийн дагуу гүйцэтгэж, бетон дэрийг замын трассын дагуу угсарч байгааг “Монголын төмөр зам” ТӨХК-ийн инженер техникийн ажилтнууд хэлж байв.
Түүнчлэн “Улаанбаатар төмөр зам” ХНН-ээс 75 вагон буюу 3,375 метр куб хайрга татан авснаас 691 метр кубыг нь буулгав. Ажлын талбайд 4,066 метр куб чулуу бутлахаар төлөвлөж, 540 метр куб балласт үйлдвэрлэн бэлтгэжээ. Мөн дам нуруут гүүрийн бүтээн байгуулалтыг үе шаттай хийж, тулгуурын дүүргэлт, завсрын тулгууруудын дам нурууны арматурчлал, хэв хашмал зэргийг угсраад байна.
Төслийн хүрээнд “Улаанбаатар БҮК” ХХК-аас 128,610 ширхэг бетон дэр худалдан авахаар төлөвлөснөөс одоогоор 90,064 ширхэгийг хүлээн аваад байгаа ажээ.
Эх сурвалж: Montsame.mn
