Засгийн газрын хуралдаанд Аялал жуулчлалыг дэмжих багц хуулийн төслүүдийг ХЗДХ-ийн сайд Х.Нямбаатар танилцуулж, ирэх долоо хоногт дахин танилцуулсны дараа УИХ-д өргөн барихаар шийдвэрлэжээ.

Хуулийн төслүүдийн гол концепцын талаар Х.Нямбаатар сайд мэдээлэл өгөв.

Тэрбээр “Аялал жуулчлалыг хөгжүүлэхэд манайд хоёр гол асуудал тулгардаг.

Нэгд, нислэгийн давтамж, тийзний үнэ.

Хоёрт, Монгол улсад ирэх визний хөнгөлөлтийн асуудал юм.

Аялал жуулчлалыг дэмжих хуулийн төслийн хүрээнд энэ асуудлуудыг давхар шийднэ. Монгол улсад ирэх жуулчдын тоог нэмэгдүүлэхийн тулд төрөөс агаарын тээврийн салбарт бизнес эрхэлж байгаа аж ахуйн нэгж байгууллагуудтай хамтран ажиллаж, дэмжих асуудлуудыг хуульд тусгасан.

Харин визний хөнгөлөлтийн асуудлын хүрээнд ирэх долоо хоногт манай яам, Гадаад хэргийн яамтай хамтран Монгол улсад хамгийн их аялдаг улс орнуудыг визний шаардлагаас чөлөөлж, визгүй нэвтрүүлэх орны жагсаалтыг танилцуулна.

Аялал жуулчлалын салбарыг хөгжүүлэх гол бодлого аймаг орон нутгууд руу чиглэнэ. Аймгууд аялал жуулчлалын салбарынхаа маршрут, үзэсгэлэнт газруудын төлөвлөлтийг хариуцах асуудлыг орон нутагт нь эрх мэдлийг шилжүүлэх замаар шийднэ.

Дээр нь Монгол улсад ирсэн гадаадын жуулчдад татварын буцаан олголт олгодог тогтолцоог нэвтрүүлэхээр хуулийн төсөлд тусгаж байгаа.

Цаашдаа ан агнуурын зах зээлийг илүү нээлттэй болгоё. Аргаль, янгир, угалз, шонхор шувууг агнах зөвшөөрлийн тогтолцоог нээлтэй байлгах нь зүйтэй гэж үзэж байна.

Аялал жуулчлалын тухай хуулийг дагалдуулж Ан агнуурын тухай хуулийг хөндөнө. Гэхдээ ховор амьтдын тоо, өсөн нэмэгдэх байдлыг нь харгалзан жил бүр салбар яам нь квотоо тогтоож байя. Тухайн гаргасан тоо хэмжээгээр нээлттэй дуудлага худалдаа явуулж, бүх анг зарж борлуулдаг зарчим руу явна.

Мөн Аялал жуулчлалын хуультай хамт цэнгээнт аялал жуулчлалыг дэмжсэн морин бооцоот уралдаан, төлбөрт тааварт тоглоом, казиногийн тухай хуулийн төслүүдийг багц байдлаар оруулахаар төлөвлөсөн.

Казинод монгол хүн орохгүй. Казиногийн лицензийг маш цөөн тоогоор олгоно. Олгохдоо зөвхөн Монголд бодит хөрөнгө оруулалт, бүтээн байгуулалт хийх хөрөнгийн дүнгээр нь лицензийг өгнө гэдэг агуулгаар Казиногийн тухай хуулийн төсөл боловсрогдож, яамны вэбсайтад нээлттэй байршсан байгаа” гэж мэдэгдлээ.