Засгийн газрын ээлжит хуралдаан өнөөдөр боллоо. Хуралдааны дараа Түгжрэлийг бууруулах Үндэсний хорооны дарга Ж.Сүхбаатар мэдээлэл хийлээ.
Тэрбээр “Хот хөдөөгийн сэргэлтийн хүрээнд Улаанбаатараас орон нутагт шилжин суурьших ажлыг дэмжих тухай Засгийн газрын тогтоол гарлаа.
Өөрийн орлогоороо төсвөө бүрдүүлдэг зургаан аймаг, алслагдсан гурван дүүргийн хүн амыг 20 орчим хувиар нэмэгдүүлэх зорилт тавьсан. Гэхдээ төвөөс хөөж туух байдлаар биш үдэх, угтах үйл явцыг сайжруулах маягаар энэ ажлыг хийхээр төлөвлөж байна.
Мөн Аймгийн засаг даргын орлогчид болон Дэд сайдуудыг төвлөрлийг сааруулах ажилд манлайлуулан оролцуулахаар тогтоолд тусгалаа.
Удахгүй Монгол Улсын ерөнхийлөгч Хятадад айлчилна. Тэр үед Улаанбаатар хотын төмөр замын доогуур нүхэн гарц шинээр барих төслийн зээлийн хэлэлцээр байгуулагдана.
Улаанбаатарын дөрвөн хэсэгт нүхэн гарц хийнэ. 30 сая долларын санхүүжилт нь шийдэгдчихвэл ирэх жилээс ажил эрчимжинэ. Ойрын гурван жилийн дотор нүхэн гарцуудыг ашиглалтад оруулна” гэлээ.
