УИХ-ын чуулганы нэгдсэн хуралдаанаар Газрын ерөнхий хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн хэлэлцэх эсэх асуудлыг хэлэлцлээ.
Харин хуулийн төслийн хэлэлцүүлгээс УИХ дахь АН-ын бүлэг тав хоногийн завсарлага авлаа.
Энэхүү хуулийн төслийн талаар дахин хэлэлцэж, салбарын мэргэжилтнүүдийн мэдээллийг сонсох зорилгоор завсарлага авч байгаагаа бүлгийн дарга О.Цогтгэрэл мэдэгдлээ.
УИХ-ын гишүүн Б.Цогтгэрэл “Өнгөрсөн 30 жилд газартай холбоотой хуримтлагдсан асуудал их байгаа. Газрын ерөнхий хууль нь өнөөдөр үзэл баримтлалын төвшинд орж ирж байгаа учраас хэлэлцэх зүйл их байна. Ардчилсан намын бүлгийн гишүүд бид Газрын ерөнхий хуультай холбогдуулаад оролцогч бүх талуудыг сонсох шаардлага байгаа учраас ажлын тав хоногийн завсарлага хүсч байна” гэлээ.
Хурал даргалагч УИХ-ын дэд дарга С.Одонтуяа УИХ дахь Ардчилсан намын бүлэгт завсарлага өглөө.
УИХ дахь Ардчилсан намын бүлгийн гишүүн Н.Ганибал "Уул уурхай, газар тариалан, аялал жуулчлалын газар бүгд кадастрын зурагтай ч бэлчээрийн газрыг орхигдуулсан хэвээр байна. Газрын тухай хууль бол бүх салбарыг хамарсан цогц бодлого байх ёстой. Дэлхийд хамгийн түрүүнд газраа бүртгэсэн байдаг. Энэ хууль газар ашиглалтын бүрэн зургаа огт багтаагаагүй байна. Эрдэнэбүрэнийг тойрсон бэлчээрийн асуудал ч мөн тодорхойгүй байгаа" гэдгийг онцолж байсан юм.
