Иргэдийн жагсаалтай холбоотой асуудлаар ЗГХЭГ-ын дарга Д.Амарбаясгалан мэдээлэл өгөв.
Тэрбээр “Засгийн газраас томоохон бүлэглэлийн зохион байгуулсан хулгайг олон нийтэд ил болгосон. Үүний үр дүнг нэхсэн жагсаал болж байна гэж ойлгож, асуудлыг түргэн шуурхай шийдвэрлэх чиглэлд хууль хяналтын байгууллагад хандлаа.
Тухайлбал, Эрдэнэтийн 49 хувийн асуудлыг тодорхой болгож, АТГ руу шилжүүлсэн. Дарханы төмөрлөгийн үйлдвэрийн нэрээр зээл авсан асуудлыг мөн тодорхой болгосон. Үүнийг хууль хяналтын байгууллага руу шилжүүлсэн. Эрдэнэс Тавантолгой компани дээр бүрэн эрхт төлөөлөгч томилж, нүүрсний хулгайг ил болгож, хариуцлага тооцох асуудлыг ил болгосон. Харамсалтай нь, энэ бүгдийн хариу одоо хүртэл гараагүй байна.
Бүрэн эрхт төлөөлөгч ажилдаа орсонтой холбогдуулж, 15 орчим албан тушаалтан АТГ-т шалгагдаж байгаа юм. Гэм бурууг шүүх тогтооно. Гэхдээ Засгийн газрын гомдлоор нэр бүхий албан тушаалтан шалгагдаж байгааг хэлэх нь зүйтэй.
Иргэд жагсаж байна. Засгийн газар шаардлагыг хүлээн авна. Жагсаалыг өөр зорилгоор ашиглах, үймээн самуун дэгдээх оролдлого бий. Тиймээс зохион байгуулагчид яриа хэлэлцээрийн шугамаар шийдвэрлэх хэрэгтэй. Засгийн газар нээлттэй байх болно. Ерөнхий сайд жагсаалын зохион байгуулагч нартай уулзаж, шаардлага хүлээж авах ажлын хэсгийг байгуулж, миний бие ахалж байна. Нээлттэй уулзаж, асуудлаа шийдэхэд бэлэн” гэлээ.
