УИХ-ын чуулганы нэгдсэн хуралдаанаар Ерөнхий сайдын мэдээллийг сонсов. Энэ удаад Эрчим хүчний сайд Б.Чойжилсүрэн эрчим хүчний салбарын мэдээллийг өгч, гишүүдийн асуултад хариулсныг товчлон хүргэж байна.
-ДЦС III-ийг 300 МВт-аар өргөтгөнө. ТЭЗҮ боловсруулсан. ОХУ-аас зээл авна гэж төлөвлөж байна. Нэгдүгээр сард багтаагаад энэ асуудлыг УИХ-д оруулж ирнэ. Уг төслийг хэрэгжүүлснээр Улаанбаатар хотын ачааллыг багасгах юм. Хэлэлцээ амжилттай үргэлжилбэл 2023 онд эхэлнэ. Нэгдүгээр ээлж нь 2026 онд, хоёрдугаар ээлж нь 2029 онд ашиглалтад орно.
-Тавантолгой ДЦС-ын тендерийг нэгдүгээр сараас өмнө зарлана. Өмнө нь хоёр удаа зарлагдсан ч шаардлага хангасан оролцогч орж ирээгүй гэдэг шалгтгаанаар зогссон. Хэд хэдэн компанийг одоо судалж байна. Чадвал 2023 оны тавдугаар сарын сүүл гэхэд оролцогчоо сонгон шалгаруулж гэрээлээд, ажлаа хоёрдугаар хагасаас нь эхлэх төлөвлөгөөтэй байна. ОХУ-ын холбогдох банкууд санхүүжилт өгье гэж байгаа. Оффтейк гэрээ хийхгүй, бодит санхүүжилт олж ирнэ. 2026 оны хоёрдугаар хагаст ашиглалтад оруулахын тулд ажиллана. Асуудал нууцлалын хэмжээнд байгаа учир илүү мэдээлэл өгөх боломжгүйг та бүхэн ойлгоорой.
-Бөөрөлжүүтийн цахилгааны станц 2024 оны дөрөвдүгээр улиралд ашиглалтад орно.
-Багануурын цахилгаан станцын ажлыг амилуулна. Одоогийн концесс эзэмшигч нь хувьцаагаа зараад гаръя гэсэн. Дээрх төслүүдийг хэрэгжүүлж чадвал 2035 он хүртэлх хэрэглээгээ хангаж чадна. Хамгийн ойрын хугацаанд ашиглалтад орох эх үүсвэр нь хувийн салбарын Бөөрөлжүүтийн цахилгаан станц.
-Аргална гэж хэлдэг байсан. Гэхдээ одоо аргалах бүх нөөц дууссан. Үүнийг шударга хэлсэн нь дээр.
-2027 он хүртэл дутагдах дулааны хангамжийг зургаан эх үүсвэр нэмж байгуулахаар төлөвлөсөн. Эхний төслийг эхлүүлсэн нь Амгалан ДЦС-ын 116 гкал/цагаар нэмэгдүүлэх ажил юм. Дулааныг 10 төгрөгөөр үйлдвэрлээд дөрвөн төгрөгөөр зарж байна. Тиймээс ААН-үүдийн цахилгаан, дулааны үнийг нэмсэн. Энэ бол либералчлалын эхлэл. Яваандаа ахуйн цахилгаан, дулааны үнийг нэмнэ. Гэхдээ эдийн засаг өссөн жилийн дараа жил нь нэмнэ гэж бодож байна.
-Эрдэнэбүрэнгийн УЦС-ыг төлөвлөсөн хугацаанд ашиглалтад оруулна. Би ирэх долоо хоногт Увс, Баян-Өлгий, Ховд аймгуудад ажиллана.
-Би бүрэн эрхийнхээ хугацаанд эрчим хүчний либералчлалыг эхлүүлнэ. Үүний хүрээнд эхний ээлжинд өр нэмж үйлдвэрлэдэггүй байхад анхаарна. Өөрөөр хэлбэл, жил бүр өсөн нэмэгдэж буй өрийг яг байгаа байранд нь чагталж зогсооно. Тэгээд цаашдын жилүүдэд өрийг үе шаттайгаар барагдуулаад явна. Үүний хүрээнд хэмнэж, менежментээ сайжруулна. Эрчим хүчний салбар 1.6 их наяд төгрөгийн борлуулалт хийж байна. Одоогийн байдлаар 1.580 орчим тэрбум төгрөгийн өр төлбөртэй.
-Оргил ачааллын үед буюу 11, 12, 1, 2, 3 дугаар сард 18-22 цаг хүртэл хэрэглээгээ хязгаарлах уриалга гаргаж байна. Үнэнээ хэлсэн нь дээр. Яваандаа тарифын өөрчлөлт хийнэ. Оргил ачааллын цагаар цахилгаан илүү үнэтэй болно.
-ОХУ-аас импортолж буй цахилгаан зогсвол яах вэ гэж байна. Ямар нэгэн байдлаар зогсвол импортолж буй хэмжээгээр хязгаарлахаас өөр аргагүй.
-ТЭЦ IV дээр 80 МВт-ын турбин зогслоо гэхэд энэ хэмжээгээр хязгаарлана. Хязгаарлахдаа тулвал эхний ээлжид хязгаарлах томоохон хэрэглэгчдийн жагсаалтыг гаргасан. Тэгэхээр ард иргэдэд бага нөлөөлнө, арай ч лаа шүдэнз бэлтгэх хэмжээнд хүргэхгүй.
