МАН-ын бүлгийн ээлжит бус хуралдаан өнөөдөр боллоо. Хуралдаанаар нийгэм, цаг үеийн өнөөгийн нөхцөл байдал болоод өнгөрсөн өдрүүдэд болсон жагсаал, цуглаантай холбоотой асуудлыг хэлэлцсэн байна.

Хуралдаанаас гаргасан шийдвэрийг УИХ дахь МАН-ын бүлгийн дарга Д.Тогтохсүрэн олон нийтэд танилцууллаа. Тэрбээр “Бид намын бүлгээсээ дараах хоёр шийдвэрийг гаргаж байна.

Нэгдүгээрт, хариуцлага тооцох асуудлыг түргэвчлэх ёстой гэж үзлээ. Жагсагчдын тавьсан шаардлагын гол нь энэ юм. Нүүрсний хулгайтай холбогдсон болон бусад ажлын хариуцлага алдсан хүмүүст хариуцлага тооцохыг тэд хүссэн. Үүнийг Засгийн газар шат шатандаа, холбогдох хууль дүрмийн хүрээнд шийдвэрлэх хэрэгтэй.

Энэ хүрээнд хийгдэх хамгийн чухал зүйл бол Эрүүгийн хэрэг хянан, шийдвэрлэх тухай хуулийн шинэчилсэн найруулга юм. Иймээс Засгийн газар ойрын хугацаанд уг хуулийн төслийг боловсруулж, УИХ-д өргөн барих шаардлагатай.

Мөн УИХ нээлттэй сонсгол хийх шийдвэр гаргасан. Нээлттэй сонсголын товыг маргааш Эдийн засгийн байнгын хорооны хурлаар тогтоно. Хуулийн дагуу 14 хоногт багтааж явуулах ёстой.

Нээлттэй сонсгол хийх тул Засгийн газар ойрын хугацаанд хуралдаж оффтейк гэх гэрээнүүдийг нууцаас гаргах хэрэгтэй.

Түүнчлэн цаашид нүүрсний хулгайтай ижил асуудал гаргахгүйн тулд УИХ энэ ондоо багтааж Уул уурхайн бүтээгдэхүүний биржийн тухай хуулийг яаралтай батлах шаардлагатай байна.

Нүүрстэй холбоотой асуудал яригдахад л төмөр замын асуудал давхар сөхөгддөг. Үүнийг нээлттэй сонсголын үеэр хэлэлцэж, шийдвэрлэх хэрэгтэй.

Хоёрдугаарт, Үндсэн хуулийн нэмэлт өөрчлөлтийн талаар хэлэлцэхээс өөр аргагүй гэж үзлээ. УИХ наймдугаар сард 54 дүгээр тогтоолыг гаргасан. Энэ тогтоолд УИХ-ын гишүүдийн тоо, сонгуультай холбоотой асуудлыг Засгийн газар судалж, Үндсэн хуулийн нэмэлт өөрчлөлтийн тухай хуулийн дагуу УИХ-д өргөн барих чиглэл өгөгдсөн. Үүнийг энэ ондоо багтааж шийдэх нь зүйтэй” гэлээ.