“Эрдэнэс Монгол” ХК-ийн бүтцийг шинээр зохион байгуулж, гүйцэтгэх захирлаас бусад долоон газар, долоон хэлтэст 88 ажлын байрны нээлттэй сонгон шалгаруулалтын талаар ЗГХЭГ-ын дарга Д.Амарбаясгалан мэдээлэл хийлээ.
Тэрбээр, Уул уурхай, эдийн засгийн чиглэлээр гадаадад болон дотооддоо сурч, мэргэшсэн залуучууд сонгон шалгаруулалтад идэвхтэй оролцохыг уриалж байна. Ажлын байранд горилогчдыг 2023 оны нэгдүгээр сарын 2-ноос e-tanhim.gov.mn бүртгэж эхэлнэ.
Эрдэнэс Монгол ХК баялгийн, хөгжлийн санг бий болгох, түүгээр дамжуулж нийгмийн салбаруудыг хөгжүүлэх үндсэн чиглэлтэй. Цаашид энэ компани цэвэр менежментийн компани болж, олон улсын зах зээлд Монгол Улсыг төлөөлж, өрсөлдөх чадвартай компани болох зорилготой. Олон ч төсөл хөтөлбөр хэрэгжүүлсэн. Амжилттай нь ч, амжилтгүй нь ч байна. Өөрийн харьяа буюу охин компаниудынхаа засаглал, менежментийг сайжруулах боломж бүрдүүлэх, тодорхой хувьцааг олон нийтэд шилжүүлэх чиглэлээр ажиллаж байна.
Засгийн газраас төрийн өмчийн компаниудын нээлттэй, ил тод байдлыг хангах бодлогын хүрээнд Эрдэнэс Монгол ХК-ийг бүтцийн өөрчлөлтөд оруулж, менежментийн компани болгон өөрчлөхөөр болсон. Сонгон шалгаруулалтыг долоон газар, долоон хэлтсээр дамжуулах юм. Үүнд,
- Нэгдсэн стратеги, Үйлдвэр технологи, Дотоод хяналт эрсдэлийн удирдлага, Төслийн судалгаа үнэлгээний, Хууль эрх зүйн, Захиргаа удирдлагын газар гэх мэт долоон газар
- Бизнес хөгжлийн, хамтын ажиллагааны, хүний нөөцийн удирдлагын, мэдээлэл технологийн гэх мэт долоон хэлтсийн хүрээнд дээрхи ажлын байруудад зарлаж байна.
“Эрдэнэс Монгол”-ын цалингийн зэрэглэл хамгийн өндөрт тооцогддог. Гэхдээ ижил чиглэлээр ажиллаж байгаа хувийн хэвшлийн уурхайн компаниудтай харьцуулахад бага. Гэхдээ төрийг төлөөлж, олон улсад үйл ажиллагаа явуулах энэ толгой компанийн цалин хөлс өндөр байх ёстой гэсэн үзэл санааг бид баримталж байна.
Цалинг 4 үе шаттай олгоно.
- Ахлах менежер /хуучнаар газрын дарга/: 9-12 сая төгрөг
- Менежер /Хуучнаар хэлтсийн дарга/: 6.5-8.5 сая төгрөг
- Ахлах мэргэжилтэн- 4-6 сая төгрөг
- Мэргэжилтэн- 2-4 сая төгрөгийн цалинтай байх ТУЗ-ийн шийдвэр гарсан. Багийн системээр үйл ажиллгаа явуулна.
Ажлын байрны сонгон шалгаруулалтын бүртгэлийг 2023 оны 1-р сарын 2-16-нд явуулна. 20-21-нд тестийн шалгалт авна. 23-28-нд нүүр тулсан ярилцлага зохион байгуулж, 2-р сарын 1-нээс багаа бүрдүүлэн шинэ менежментээр үйл ажиллагаа явуулж эхэлнэ.
Ажлын байрны нийтлэг шаардлага:
- Бакалавр болон түүнээс дээш зэрэгтэй
- Нэг ба түүнээс дээш гадаад хэлний мэдлэгтэй
- Ахлах менежер улсад 8-аас дээш жил ажилласан байх
- Менежер нь улсад 5-аас дээш жил ажилласан байх
- Мэргэжилтэнд ажилласан жилийн шалгуур тавихгүй
- Хууль эрхзүй, хөгжлийн бодлого төлөвлөлтийн асуудлаар тестийн шалгалт авна. Шалгалтыг ТАЗ-ийн шалгалтын системд суурилж явуулна гэв.
“Эрдэнэс Монгол” ХК-д одоо 55 хүн ажиллаж байна. Үүнээс 14 хүний ажлын байр байхгүй болсон учир ажлаас чөлөөлөгдөх мэдэгдэл өгсөн. Гэхдээ эдгээр 55 хүн бүгд сонгон шалгаруулалтад оролцох эрх нь нээлттэй.
Мөн Эрдэнэс Тавантолгой ХК, Шивээ-Овоо ХК, Эрдэнэс Метан ХК, Эрдэнэс Шивээ Энержи ХК, Эрдэнэт үйлдвэр ТӨҮГ, Монгол росцветмет ХК, Дархан төмөрлөгийн үйлдвэр, Эрдэнэс алт ресурс, Эрдэнэс силвер ресурс, Эрдэнэс Оюу толгой, Газрын ховор элементийн судалгаа хийх төсөл зэрэг байгууллагад ийм өөрчлөлт хийнэ.
Хоёр дахь том сэдэв бол, Монгол Улсын төрд ТӨБЗГ, Эрдэнэс Монгол ХК-аар дамжин 110 орчим ТӨҮГ үйл ажиллагаагаа явуулж ирсэн. Эдгээр байгууллагыг нээлттэй, ил тод болгож, цомхон бүтэцтэй, ашигтай ажилладаг болгоход чиглэж ажиллана. ТӨҮГ-уудыг үе шаттайгаар олон нийтийн хяналтад шилжүүлнэ. Одоогийн байдлаар Төрийн банкны хувьцааны 20 хүртэлх хувийг олон нийтийн хяналтад шилжүүллээ.
Төрийн өмчийн хуулийн этгээдийн хувьцааг биржээр олон нийтэд нээлттэй худалдах тогтоол энэ оны дөрөвдүгээр сард батлагдсан. Нийт 26 төрийн өмчийн компанийн 34 хувийг эхний ээлжинд олон нийтийн хяналтад шилжүүлэхээр болсон. Хөрөнгийн бирж, Монголын цахилгаан холбоо, Мэдээлэл холбооны сүлжээ, Мэдээлэл технологийн үндэсний парк гэх мэт 26 төрийн өмчит компани нэрлэгдэж буй.
Ингэснээр төрийн өмчүүдийг олон нийтэд нээлттэй болгоход дан ганц төр бус олон нийтийн хяналтад шилжсэн бирж зохион байгуулах юм гэлээ.
