УИХ-ын өнөөдрийн /2022.06.16/ чуулганы нэгдсэн хуралдаан үргэлжилж байна. Хуралдаанаар Монгол Улсын Ерөнхийлөгч У.Хүрэлсүхийн санаачилж, өргөн барьсан “Хүнсний хангамж, аюулгүй байдлыг хангах талаар авах зарим арга хэмжээний тухай” Улсын Их Хурлын тогтоолын төслийн анхны хэлэлцүүлгийг хийж байна.
Хэлэлцэж байгаа асуудалтай холбогдуулан гишүүд асуулт асууж, байр сууриа илэрхийлж байна.
Энэ үеэр УИХ-ын гишүүн Ж.Бат-Эрдэнэ "Хүнсний салбарт хувьсгал хийхээр оруулж ирж байгаа маш том бодлого, хууль гэж харж байна. Хөдөөгийн ард түмэн өндөр хэмжээнд хүлээн авч байгаа шүү. Ажлын хэсэгт орж ажилласан. Хэдэн зүйл дутуу байна. Малын эрүүл мэндийг таван жилийн хугацаанд бүх өвчнөөс нь салгахаар зааж өгсөн. Гурван жилийн хүрээнд шүлхий өвчнөөс салгая гэж байнгын хороогоор батлуулаад явсан. Үүнийг таван жил болгохоор оруулж ирж байна. Энэ тал дээр тодорхой мэдээлэл өгнө үү" гэв.
Үүнд, Хүнс хөдөө аж ахуй, хөнгөн үйлдвэрийн сайд З.Мэндсайхан "Малын эрүүл мэндийн асуудалтай холбоотой тогтоол гарсан. Вакциныг жилд хоёр удаа хийх нь зөв гэсэн байнгын хорооноос үзсэн. Энэ хуульд бүрэн туссан. Нийт 145 тэрбум төгрөгийн төсөв суулгасан" гэх мэдээллийг өглөө.
