Нийслэлийн Сонгинохайрхан дүүргийн ИТХ-ын дарга Б.Хуягбаатарын захирамжаар өнгөрсөн сард хорооны иргэдийн Нийтийн хурлын дарга, тэгүүлэгчидэд зориулсан “Иргэдийн Нийтийн хурлын үйл ажиллагаанд иргэдийн оролцоог хангахад анхаарах зарим асуудлууд” зохион байгуулжээ. Хэлэлцүүлгийг хотод бус харин амралтын газар явуулсан байна. Цар тахлын энэ хүнд үед бүхий л хурал зөвлөгөөн, сургалт, хэлэлцүүлгийг зайнаас явуулж байна. Гэтэл дээрхи хэлэлцүүлгийг амралтын өдрийг тааруулж байгаад агаар салхинд хийж тансагласан нь халдвар хамгааллын дэглэмийг үлгэрлэн сахих ёстой эрхэм дарга өөрөө журмаа зөрчжээ. Зөвхөн оролцсон хүмүүсийн тооноос л үзэхэд ихээхэн бөөгнөрөл үүсгэсэн нь илт харагдаж байна. Тус дүүрэг нь 43 хороотой. Төдий тооны Нийтийн хурлын дарга дээр тэргүүлэгчид хэмээх 2-4 хүн, мөн хурлын нарийн бичгийн дарга нарыг нэмбэл 100 гарна. Дээр нь дүүргийн ИТХ-ын ажлын албаныхан бүрэн бүрэлдэхүүнээрээ явсан нь ойлгожтой. Намрын налгар өдөр нар салхинд гарах боломжийг алдаагүй биз. Ингээд 100 хол илүү гарсан тооны хүн хэлэлцүүлэгт явсан гэсэн тооцоо гарч байна. Ийм олон хүнийг том амралтын газар л “шингээж” чадах нь мэдээж. Бүх даргыг автобусаар зөөн “Хишиг Монгол” амралтын газарт хүргэжээ. Энэ амралтын газар хариуцлагын гэрээ байгуулсан эсэх нь тодорхойгүй. Удирдагч багш нараас эхлээд ИТХ-ын дарга мундаг илтгэл тавьж хэлэлцүүлсэн байна. Олон дарга нарын идэж уух нь ойгүй их. Идээ ундаанд л гэхэд 8,8 сая төгрөг зарцуулагджээ. Хэлэлцүүлгийн дараа дарга нар хүүхэд шиг хөгжөөнт тоглоом тоглож цэнгэжээ. Өрөө өрөөндөө ороод "ундаа" ууж үргэлжүүлэн цэнгэсэн байх магадлалтай. Нэг аягаар уугаагүй л гэж найдахаас ... Ингээд амралтын байр, танхимын төлбөрт 7,5 сая гээд нийт 16 сая төгрөгийг энэхүү “чухал” хэлэлцүүлэгт үрсэн байна. Уг нь ажлын өдрөөр цахимаар хийвэл хамаагүй хямд тусах байсан ч Б.Хуягбаатар дарга заавал амралтанд хийх хуягласан шийдвэр гаргасан. Дарга нараас амралтанд явахаас өмнө, буцахаас өмнө хоёр удаа “ковид-19”-ийн түргэвчилсэн шинжилгээ авчээ. Ганц хоногийн дотор халдвар авсан эсэх нь тогтоогдохгүй тул энэ нь ёс төдий арга хэмжээ юм. Өдгөө ИТХ-ын дарга Б.Хуягбаатар амралтаас ирсэний дараа нэг ч хүн өвдөөгүй гэсэн баталгааг гаргаж чадах эсэх нь сонин.
