Баянзүрх дүүргийн иргэдээс Засаг даргатай уулзах хүсэлт ирүүлсний дагуу Засаг дарга Н.Баярмөнх тогтмол холбогдох албан тушаалтнуудын хамт иргэдийг хүлээн авч уулздаг. Улмаар тэдэнд тулгамдсан асуудлыг сонсож, дүүрэг орон нутаг өөрсдийн боломжоор шийдэх боломжтойг шийдэж, боломжгүй асуудалд шаардлагатай зөвлөгөө, мэдээллийг өгч байгаа.
Энэ удаа уулзсан иргэдийн дийлэнх нь газар, байрны тохижилт, дулаалга, ногоон байгууламж, алслагдсан хороодын мал аж ахуйн талаар асуудлыг дэвшүүлж байлаа. Дүүргийн Засаг дарга Н.Баярмөнх хэлэхдээ “Баянзүрх дүүрэгт нэг бүрчлэн дурвал маш олон асуудал бий. Бид энэ бүхнийг нэг дор нь шийднэ гэвэл үүн шиг худлаа зүйл байхгүй. Гэхдээ бид бүх шатандаа уялдаа холбоотой ажиллаж, 2022 оноос эхлэн хог, ногоон байгууламж, цэцэрлэг сургууль, гэрэлтүүлэг, авто зам, автобусны буудал гээд иргэдийн өмнө тулгамдаж буй олон асуудлыг шийдэж, шинэ шатанд гаргана. Үүнд иргэдийн дэмжлэг, хамтын ажиллагаа чухал. ” гэсэн юм.
Иргэдийн хувьд Засаг дарга болон холбогдох мэргэжлийн ажилтан алба хаагч нартай уулзаж, зарим асуудлаа шийдвэрлүүлэх гарц гаргалгаа олох, хүсэлтээ шийдүүлэх зэрэг үр дүн ихтэй байгаа талаар хэлж байлаа.
Түүнчлэн иргэдэд сонирхуулахад 2022 онд Баянзүрх дүүрэг газар чөлөөлөлт, ногоон байгууламж, тохижилт үйлчилгээ, гэрэлтүүлэг, авто зам гэх мэт томоохон чиглэлээр иргэдийн өмнө тулгамдсан асуудлыг шийдэхээр төлөвлөн ажиллаж байна.
