Баянгол дүүргийн Иргэдийн төлөөлөгчдийн хурлын дарга Б.Сэмжидмаа болон тус дүүргийн 41 төлөөлөгч төсвийн мөнгөөр дархлаагаа дэмжсэн тухай баримтыг танилцуулъя.
Тухайлбал, Баянгол дүүргийн Иргэдийн төлөөлөгчдийн хурлын дарга Б.Сэмжидмаа 2021 оны 07 дугаар сарын 06-ны өдөр “Албан хаагчдын эрүүл мэндийг дэмжих тухай” 26 тоот захирамжийг гаргажээ. Уг захирамжид, “Албан хаагчдын эрүүл мэндийг дэмжих, ковид 19 цар тахлын халдвараас урьдчилан сэргийлэх зорилгоор дархлаажуулалтыг дэмжих багцыг худалдан авахад шаардагдах зардлыг нэгдүгээр, дархлаажуулалтын багц олгох албан хаагчдын нэрсийг хоёрдугаар хавсралт ёсоор тус тус баталсугай.
Хавсралтад заасан бараа 19,798,500 (арван есөн сая долоон зуун наян таван мянга таван зуу) төгрөгийг бараа үйлчилгээний бараа үйлчилгээний бусад зардлаас гаргахыг Захиргаа зохион байгуулалтын хэлтсийн Ерөнхий нягтлан бодогч (С.Эрдэнэчимэг)-д зөвшөөрсүгэй.
Захирамжийн хэрэгжилтэд хяналт тавьж ажиллахыг Тэргүүлэгчдийн нарийн бичгийн дарга бөгөөд Ажлын албаны дарга (А.Даваажаргал)-д даалгасугай.
Дарга Б.Сэмжидмаа” гэжээ.
Хамгийн сонирхолтой ковид 19-өөс урьдчилан сэргийлэх дархлаажуулалтын багц олгох албан хаагчдын нэрсийн жагсаалтын нэгдүгээрт БГД-ийн ИТХ-ын дарга Б.Сэмжидмаа, БГД-ийн ИТХ-ийн дэд дарга Г.Мөнхсайхан, Н.Болдбаатар, Ү.Батбаяр болон Ажлын албаны дарга нар А.Даваажаргал гэсэн нэрс бичигдсэн нь анхаарал татаж байгаа юм.
Мөн энэхүү жагсаалтыг Баянгол дүүргийн ИТХ-ын 41 төлөөлөгч болон 25 хорооны иргэдийн нийтийн хурлын нарийн бичгийн дарга нарын нэрс үргэлжлүүлжээ.
“Албан хаагчдын эрүүл мэндийг дэмжих тухай” 26 тоот захирамжийн дагуу Б.Сэмжидмаа тэргүүтэй Баянгол дүүргийн удирдлагууд “Витамин C”, “Витамин D”, “Алфавит”, “Зөв аарц”, “Чацаргана” гэх мэтээс бүрдсэн 132 мянган төгрөгийн үнэ бүхий 150 ширхэг багцийг 19,7 сая төгрөгөөр худалдан авч дархлаагаа дэмжин ковидоос сэргийлжээ.
Товчхондоо эндээс цар тахлын нөлөөгөөр иргэд хэдэн мянгаараа эмнэлгийн тусламж авч чадалгүй гэртээ нас барцгааж байхад бүхэл бүтэн 200 мянган хүнтэй дүүрэг төлөөлж байгаа албан тушаалтнууд ийнхүү төсвийн мөнгөөр дархлаагаа дэмжин хувиа борлуулж, довоо шарлуулсан үйлдэл харагдаж байна.
