Булган аймгийн ИТХ-ын дарга Д.Эрдэнэбатаар ахлуулсан ажлын баг Бугат, Хангал суманд ажиллалаа.
Орон нутгийн хөгжлийн бодлого төлөвлөлт, тогтоол шийдвэрийн хэрэгжилт, “Аймгийн ИТХ-ын 2020-2024 онд баримтлан ажиллах чиглэл”-ийн талаар иргэдэд мэдээлэх, тэдний санал, хүсэлтийг сонсож хүлээн авах, нутгийн өөрөө удирдах байгууллагын талаарх иргэдийн ойлголт хандлагыг дээшлүүлэх, үйл ажиллагааг сурталчлахад ажлын багийн зорилго чиглэлээ. Аймгийн ИТХ-ын дарга тухайн сумын төр, төсвийн байгууллагын ажил байдалтай танилцаж, тулгамдсан асуудлыг судалсны дээр иргэд, төрийн албан хаагчдын төлөөлөлтэй уулзаж санал хүсэлтийг сонслоо.
Бугат сумын иргэд бэлчээрийн доройтлыг бууруулах, мал аж ахуйг эрчимжүүлэх, ойн санг хамгаалах, Хангал сум, Хялганат тосгоны иргэд дэд бүтцийг хөгжүүлэх, Хялганат-Орхон аймгийн хооронд засмал зам тавих, ажилгүйдлийг бууруулах, ажлын байраар хангахад анхаарах зэрэг асуудлаар санал бодлоо илэрхийллээ гэж аймгийн ИТХ-ын Ажлын албанаас мэдээллээ.
Мөн аймгийн ИТХ-ын Ажлын албаны мэргэжилтнүүд Бугат, Хангал сумын ИТХ-ын ажлыг шалган, зөвлөн туслах ажил хийсний дээр иргэд, ИТХ-ын төлөөлөгч нарын төлөөлөлд эрх зүйн сургалт хийсэн байна. Тухайн тойргоос сонгогдсон аймгийн ИТХ-ын төлөөлөгч Х.Ууганбаяр, А.Сод-Эрдэнэ, Б.Уянгабат нар ажлын багт орж ажиллалаа.
