Боловсрол, шинжлэх ухааны сайд Л.Энх-Амгалан 2021 оны нэгдүгээр сарын 29-нд сайдын ажлаа хүлээж авах үеэрээ цаашид ямар, бодлого чиглэл барьж ажиллах талаараа дурдсан.
Тэрбээр "Ерөнхий сайдын тэргүүлэх Засгийн газрын анхаарч, хийх ёстой шинэчлэлийг эхлүүлнэ гэдгээ бид ярилцаж, тохиролцож байгаа.
Нэгд, ковидыг ялан дийлэх ёстой. Эдийн засгаа хөл дээр нь босгож, ард иргэдийнхээ орлого ажлын байрыг хамгаалах чиглэлд нэлээд үсрэнгүй арга хэмжээг авах зайлшгүй нөхцөл байдал үүссэн.
Хоёрт, дундаж давхаргын тогтолцоог бий болгох, үүн рүү чиглэсэн реформыг бид цаг алдалгүй хийх ёстой.
Монголд ядуурал, ажилгүйдэл, нийгмийн тэгш бус байдал, орлогын ялгаа өндөр байгаа нь өнгөрсөн 30 жилийн боловсролын салбарын үр дүн гэж дүгнэж байна. Боловсролын салбарын шинэчлэл зөвхөн МАН-ын асуудал биш, энэ бол үндэсний зөвшилцлийн хүрээнд хийх ажил юм
Гэхдээ шинэчлэл хийнэ гээд яаруу, сандруу ажил хийх нь бас аюултай. Боловсролоор тоглох бүр ч аюултай. Тулгамдаж байгаа гол асуудлаа үе шаттай шийдээд явна.
Ковидоос болж олон иргэн орлогогүй болохоос гадна нэгэн шинэ үе бичиг үсэг мэдэхгүй, сургуулийн танхимд ч орж үзээгүй байна. Энэ тулгамдаж байгаа, сэтгэл эмзэглүүлсэн асуудлуудыг цаг хугацааны эрэмбэ дарааллаар ангилж, бодлого шийдэл гаргаж, УИХ-даа танилцуулна.
Хамгийн түрүүнд боловсролын салбарын санхүүжилтийн ужгирсан тогтолцоонд үнэлэлт дүгнэлтүүд хийнэ. Мөнгө хүүхдэдээ, багш нартаа очих ёстой. Ийм бага үнэлгээтэй, цалин нийгмийн хамгаалал нь хангагдаагүй орчинд ажиллаж буй хүмүүсээс ямар бүтээмж, ямар ур чадвар нэхэх вэ. Тогтолцоогоор нь харж өөрчлөх зайлшгүй шаардлага байна.
Мөн теле, цахим хичээлээс үүдэлтэйгээр боловсролын ялгаатай байдал үүсч байна. Өнөөдөр алслагдсан аймаг суманд интернэт, компьютер тоног төхөөрөмж байхгүй 170 мянган хүүхэд байна гэсэн тоо ярьж байгаа. Энэ маш том тоо . Энэ асуудалтай цаг алдалгүй танилцаж, шийдвэрүүд гаргана" гэжээ.
