УИХ-ын гишүүн, Инновац , цахим бодлогын байнгын хорооны дарга Э.Батшугарын ярилцлага Зууны мэдээ сонины өнөөдрийн дугаарт нийтлэгджээ.
УИХ-ын гишүүн, Инновац , цахим бодлогын байнгын хорооны дарга Э.Батшугар “Монголчууд цахим үндэстэн болно” гэсэн зорилготой холбоотой асуудал дээр байр сууриа илэрхийлсэн байна.
Тэрбээр “НҮБ-ын индексээр манайх 14 байр урагшлаад дэлхийд 74-т жагсаж байна. "И-Монголиа" системээс төрийн 685+ үйлчилгээг авдаг болсон байна. Үүний цаана маш их цаг хугацаа, эдийн засгийн хэмнэлт үүсч байгаа. Салбар маань өнгөрсөн онд багц дөрвөн хуультай болсон. Цахим хөгжлийг дэмжих хуулиудын хэрэгжилт дээр бид сайтар анхаарч ажиллаж байгаа.
Нөгөө талдаа оюуны экспортыг нэмэгдүүлэх, олон улсын сайн туршлагыг нутагшуулах, эдийн засгаа солонгоруулах зорилгод өөрийн хувьд илүүтэй анхаарч ажиллаж байна.
Бизнес эрхлэх таатай эрх зүйн орчинг нь бий болгоё. Татварын хөнгөлөлтүүдийг нь өгье. Хүний нөөцийг нь бүрдүүлэх бодлогыг тодорхойльё. Банк санхүүгийн салбарыг либераль болгоё. Тэгээд үлдсэн зүйлийг монгол залуучууд өөрсдөө бүрэн хийгээд аваад явах боломжтой гэж харж байна.
Саяхан монгол залуучууд Казахстаны үүрэн телефоны хамгийн том компанид клауд үйлчилгээ үзүүлэх компаниар шалгарчихлаа. Энэ бол ганцхан жишээ. Монгол Улс ийм мянган компанитай бол гадаадаас орж ирэх орлого тэрбум тэрбумаар яригдана. Заавал бид нүүрс зэсний үнээс, аль нэг боомтоос хамааралтай амьдрах шаардлагагүй болно. Эцсийн үр дүндээ нийт эдийн засгийн өгөөж нь хэмжишгүй боломж гэж харж байгаа. Монгол Улс ажиллах хүчээ биш оюун ухаанаа экспортолдог улс болоход төрийн бодлого шийдвэрийг чиглүүлэх том амбицтайгаар ажиллаж байгаа” гэлээ.
