Шүүх шинжилгээний тухай хуулийн төслийг өнгөрсөн гуравдугаар сард Засгийн газраас өргөн мэдүүлсэн.
Тус хуулийн төслийг боловсруулах ажлын хэсгийг УИХ-ын гишүүн Э.Бат-Амгалан ахалж, бүрэлдэхүүнд УИХ-ын гишүүн Б.Дэлгэрсайхан, Ц.Сэргэлэн, Ц.Мөнх-Оргил, Б.Жаргалмаа нар багтжээ.
Тэгвэл өчигдөр ажлын хэсгээс Улсын дээд шүүх, ХЗДХЯ, Шүүхийн шинжилгээний үндэсний хүрээлэн, Улсын ерөнхий прокурорын газар, Цагдаагийн ерөнхий газар, Сэтгэцийн эрүүл мэндийн үндэсний төвтэй хамтран хуулийн хэлэлцүүлгийг зохион байгууллаа.
Монгол Улсын шүүхийн практикт гэмт хэргийн улмаас сэтгэл санааны хохиролд буюу сэтгэцэд учирсан хор уршгийг арилгах, нөхөн төлбөр авсан кейс бусад хохирлыг нэхэмжилж шийдвэрлүүлсэн тохиолдол цөөн байдаг байна. Тиймээс тус хуулиар сэтгэл санааны хохирлыг тооцон нөхөн төлбөр олгох чиглэлд эрх зүйн орчин бүрдэнэ гэдгийг ажлын хэсгийн ахлагч Э.Бат-Амгалан хэллээ.
ХЗДХЯ-ны Төрийн нарийн бичгийн дарга П.Сайнзориг "Сэтгэл санааны хохирлыг мөнгөн хэлбэрээр барагдуулах гэж нийтээрээ ярьж хэвшсэн ч хуулийн төсөлд “сэтгэцэд учирсан хор уршиг" хэмээх нэр томьёог хэрэглэсэн нь Сэтгэцийн эрүүл мэндийн тухай хууль дахь нэр томьёоноос үүдэлтэй. Сэтгэцэд учруулсан хор уршгийг тооцох гадаад улс орнуудын туршлагыг судалсны үндсэн дээр хоёр аргачлал нийтлэг жишиг болжээ. Тодорхой өгөгдлийн хүснэгт ашиглан мөнгөн хэлбэрээр эдийн бус хохирлын нөхөн төлбөрийг тооцох, эсвэл шүүгч эрх зүйн практик дээр үндэслэн нөхөн төлбөрийг тооцох гэсэн хоёр төрлийн аргачлал байдаг" гэдгийг онцоллоо.
