Соёлын сайд Ч.Номин өнөөдөр ОХУ-аас Монгол Улсад суугаа Онц бөгөөд Бүрэн эрхт Элчин сайд И.К.Азизовийг Соёлын яаманд хүлээн авч уулзлаа.
Талууд Монгол Улс, ОХУ-ын Соёлын яамд хоорондын 2024 он хүртэл хамтран ажиллах хөтөлбөрийн хэрэгжилтийг хангах болон хоёр орны соёл урлагийн салбарын хамтын ажиллагааны хүрээнд өрнөж буй бусад төсөл арга хэмжээний талаар санал солилцов.
Соёлын сайд Ч.Номин уулзалтын эхэнд хоёр улсын Соёлын яам хооронд байгуулсан хамтран ажиллах хөтөлбөр амжилттай хэрэгжиж эхэлсэнд сэтгэл хангалуун буйгаа илэрхийлж, Ю.Н.Григоревичийн нэрэмжит Олон улсын балетын уралдаанд Монгол Улсын уран бүтээлчдийг оролцохыг урьж, Монгол Улсаас оролцсон найман уран бүтээлч бүгд амжилттай оролцож, нэг балетын жүжигчин өндөр зэрэглэлийн тус тэмцээнд тусгай эзэлж, өндөр амжилт гаргасан талаар дурдлаа.
Түүнчлэн Соёлын яамны харьяа Хүүхэлдэйн театрын уран бүтээлчид ирэх сарын 04-10-ны өдрүүдэд ОХУ-ын Буриадын Бүгд Найрамдах Улсын Улаан-Үүд хотод зохион байгуулагдах олон улсын хүүхэлдэйн театрын 4 дүгээр удаагийн наадамд ОХУ-ын урилга, дэмжлэгээр оролцох гэж байгааг дурдаж, талархал илэрхийлэв.
Мөн Соёлын сайд Ч.Номин “Чингис хаан” хаад язгууртны музей энэ оны гуравдугаар улиралд нээгдэх гэж байгаатай холбогдуулан Монгол нутаг дахь археологийн дурсгалын асуудлыг хөндөж, соёлын хамтын ажиллагааны хүрээнд бусад улс орнуудаас Монголын эртний төрт улс, Их Монгол Улс, XV-XX зууны Монгол Улсын гэж үечлэн Монгол Улсад холбогдох археологийн олдвор, соёлын өвүүдээ судлан гадаад улсаас цуглуулж, судалгаа шинжилгээ хийх, музейн сан хөмрөгийг баяжуулах ажил хийгдэж байгаа талаар хэллээ.
Өнөөдрийн байдлаар “Чингис хаан” хаад язгууртны музей нь 10 мянга орчим үзмэрийг дэлгэхээр үзмэр таталт, сэргээн засварлалтын ажил хийгдэж байгаа бөгөөд одоогийн байдлаар 11 улсаас 20 гаруй археологийн олдвор, эд өлгийн зүйлсийг хуулбарлан Монгол Улсдаа авчирч, эрдэм шинжилгээний ажлууд үргэлжилж байна. Цаашид 8 улсаас 46 үзмэрийн эх хувь болон хуулбарыг авахаар ажиллаж байгааг танилцуулав.
Улмаар Соёлын сайд Ч.Номин Оросын нэрт судлаачид Монгол Улсын археологийн салбар, судалгаа шинжилгээний хөгжилд үнэтэй хувь нэмэр оруулсан талаар дурдаж, тодорхой цаг хугацаанд хамаарах зарим олдворыг холбогдох байгууллагын төлөөллийг оролцуулсан хамтарсан ажлын хэсгийг байгуулан судлах, хуулбарлан авчрахад ноён Элчин сайд И.К.Азизовыг дэмжлэг үзүүлэн, хамтран ажиллана гэдэгт итгэлтэй буйгаа илэрхийллээ.
Тухайлбал, ОХУ-ын нэрт судлаач, Монгол-Төвөдийн судалгаа шинжилгээний багийн дарга П.К.Козловын 1924 онд Монгол Улсад удирдан явуулсан археологийн малтлагын үеэр илэрсэн Хүннүгийн үеийн олдворуудыг судалгаа, шинжилгээний зориулалтаар тухайн үеийн Ленинград хот руу илгээсэн байдаг юм.
Талууд хоёр улсын Соёлын яам хооронд 2024 он хүртэл хамтран ажиллах хөтөлбөрийн хүрээнд байгуулахаар тохиролцсон “Чингис хаан” хаад язгууртны музей болон ОХУ-ын “Эрмитаж” музей хоорондын хамтын ажиллагааны эрх зүйн баримт бичигт дээрх олдворуудтай холбоотой авч хэрэгжүүлэх хоёр талын арга хэмжээний зохицуулалтыг тусгах, судалгаа, эрдэм шинжилгээний эргэлтэд оруулах боломжийг эрэлхийлэн ажиллахаар болов.
Мөн талууд сонгодог урлагийг хөгжүүлэх, соёл, спортын хамтын ажиллагааны хүрээнд уран гулгалт, хоккей, мөсөн шоуг хамтран зохион байгуулах бэлтгэл ажлын талаар мэдээлэл солилцож, Монгол Улсын Биеийн тамир, спортын улсын хороотой хамтран хэрэгжүүлэх чиглэлээр үргэлжлүүлэн ажиллахаар боллоо.
