БЗС-гийн асуудал өндрийг авч, ард олон хэдэн өдөр л тэмцэл, дуулианы “дарь үнэрлэж” байна. Завшсан, залилсан, зээлсэн, тэглэсэн, эрх мэдлээ урвуулан ашигласан элдвийн но-л илрээтхэв. Иргэд бухимдуу байна. БЗС-гийн гэх энэ том булхайн тос, усыг ялгана хэмээн улайрч байна. Тэр нь ч багагүй амжилт олж байх шиг.

Гэхдээ бид олноороо нэгэн зүйлийг л огтоос умартмааргүй, мартмааргүй. Юун гэвээс бидний өмнө БЗС-гийн будлианаас урьтаж шийдэх асуудлууд өчнөөн бий шүү дээ. Үүнийг л ухаармаар. Бултаараа сийрэг, хэрсүү баймаар.

Эрх баригчид ҮХНӨ оруулна хэмээн чичирч байгаа. Үндсэндээ тэр хэрэг БЗС-гийн дуулианд цохигдож, ард нийтийн ой санамжаас “арчигдах” чигтэй боллоо. Гишүүд тойрогтоо ажиллаж байгаа гэх. Гэхдээ долоо хоног дундаа орчихоод байхад энд, тэнд хурал хуй, цуглаан мэтгэлцээн өрнөж байна гэх чимээ лав дуулдсангүй. Чимээгүйхэн ийн байж байгаад гэнэтхэн л “Ард олон гишүүдийн тоог 126 болгохыг дэмжлээ, батална аа” гээд л “бөмбөг тэслэчих” вий л гэж сэрдэх. Үгүйсгэхийн аргагүй юм.

Ер нь тэгээд манай Монголчууд туйлын богино ой санамжтай ард түмэн. Загастай ч адилтган зүйрлэх нь бий. Өвлийн хэргийг хавар нь мартана. Хаврын хэргийг зун нь умартана. Нэг дуулианаар нөгөөг сарниана. Нэжгээд ийм л үлгэрээр он цагийг элээнэ.

Өнөө долоон тэрбумыг гэртээ “баринтаглаж” байгаад баригдсан С.Батдөлийн хэрэг өнөө хүртэл шийдэгдээгүй хэвээр. Нууц, таг, бүрхэг. Араас нь Шувуу ажиллагааны хүрээнд хил дамнуулан авч ирсэн Т.Бадамжунайн хэрэг ч тийн жаягаар замхрах шиг боллоо.

Ард нийтээрээ тэмцэн барин байж олны анхааралд өртүүлсэн нүүрсний хулгайн хэрэг ч “бантан, жанхуу” боллоо. Хэдэн нөхөр гишүүний бүрэн эрхээсээ татгалзмар болоод л хэрэг царцав. Тос, ус нь утгаараа ялгарсангүй. Түмний тэмцэл улстөрчдийн даажин болоод л дуусав бололтой.

Үүнээс нэг л зүйл тод анзаарагдаж байна. Тэр нь болбоос манай хууль, шүүхийн байгууллагын үнэн дүр төрх. Туйлын хангалтгүй ажиллаж байгаа, илт.. Засгийн газар нь дорвитой хөдлөөд л байдаг гэвч хамаг хэргийн гогцоо хууль, шүүхийн байгууллага дээр л зангирчихаад байгаа.

Ерөнхий сайд уг нь “та нарыг би харж байгаа шүү” гээд л шүүхийг тогтмол “хатгаад”, ард олон ч шударга шийдвэрүүд гарах байх гэж хүлээлт тавьсаар байгаа, Гэвч өнөөдүүл нь өөдийн заяагүй. Булхай бурангуйг нэг тийш цэгцэлж, ард нийт, улс орноо хохироосон эрх мэдэлтнүүдийг “хашраахын” чадал, зүтгэл огтоос үгүй. Элдэв хатгаас, авлигад автаж, асуудлыг замхруулж, царцааж, удаахдаа л сайн. Түүнээс нэт чадамжгүй. Хөлдүү, хөшингө...

Зүй нь бол манай хууль, шүүхийнхэн шударга шүүх, шударга тогтолцоо, шударга ёс гээчийн дүр ямар байдгийг ард олондоо харуулж, бодит нотолгоо, үлгэр үзүүлмээр байгаа юм. Хулгайч, худалч улстөрчдийг хуйгаар нь “хяргамаар” байгаа юм. Идэвхийлэн ажиллаад, ид хаваа гайхуулмаар байгаа юм.

Тэгж гэмээнэ л сайхан цаг ирнэ. Саар бүгдэд дарлуулсаар цөхөрсөн сая ардын итгэл ч тийн хэрд тэнхэрнэ...

Amlalt.mn