Дээгүүр толгой, дээгүүр толгойт гээд байх. Бөхчулууны Пүрэвдоржийг хэлж байгаа юм. Алтантээлийн хөндийн алгадмал салхинд торниж, агсамдуухан гэмээр цээж өндиймөл энэ эр эдүгээн УИХ-ын гишүүд дотроо толгой дээгүүр нь үнэн. Дээгүүр толгойт гээд байгаа нь УИХ-ын гишүүн болохоос өмнөх хоч нэр байх. Дээгүүрхэн хардаг, дээгүүр харьцдаг байснаар ойлгогдоод, тэгж нэршсэн, тэр нь өнөөдөр төрийн түшээ болсноор чимэг ч юм шиг ойлгогдохоор болж.
Дээгүүр толгойтой байхын тус нь барьцаалагдахгүй, шударга үнэн, иргэд сонгогчдынхоо өмнөөс эгц харах чадвартай байгаагаар нь хэмжигдэнэ. Энэ нь Бөхчулууны Пүрэвдоржид байх шиг байдаг. Хэлэх гэсэн үгээ харин ч оночтой хэлээд, бүүр нэг байнд нь хадаагаад байх шиг үзэгддэг. Уржигдархан, Үндсэн хуулийн өөрчлөлтийг батлав даа. Сарын өмнө хэлж байсан үгээ сонсгож байна лээ, гар утаснаасаа. Үндсэн хуулийн өөрчлөлтийг, өнөөдрийн эрх баригчдын эдүгээн төсөвт тодотгол хийх, цалин тэтгэврийг нэмэх, хүүхдийн мөнгө өгүүлэх зэргийг “вангадчихсанаа” нотолж сонсгож байна лээ. Ерөнхийдөө УИХ-ын гишүүд дотроо толгой өлгүүр, дээгүүр байгаагаа нотолж байгаа бололтой юм. Бололтойсох ч юмгүй, дээгүүрхэн хараад байгаагаа илэрхийлж байна лээ.
Өнөөдрийн, үүний өмнөх парламентад ч Б.Пүрэвдорж яльгүй бүдүүлэг гэмээр ч, яг үнэндээ эрх баригчдын эсрэг сөрөг хүчний үүргийг бодьтойхон гүйцэтгэж, дуу тод, дугтараа ганган байсан гэвэл үгүй гэж мэтгэх хүн бараг гарахгүй байх. Эрх баригчдын болохгүй, бүтэхгүйг үнэндээ Б.Пүрэвдорж л сарнайтал хэлж, салхи хөдөлгөж байсан гэхэд хилс үгүй.
Ер нь нэг тийм үнэнд дуртай, үнэнээр үйлдэл хийх дуртай түшээ нь мэдэгдээд байдаг. Ховдоос хоёр сонгогдчихлоо. Гурав дахиа нэг их торохгүй гарах байх. За тэгээд, сая холимог тогтолцоог баталчихлаа. Ардчилсан нам ам бардам, нүүр тод байя гэвэл Б.Пүрэвдоржийг жагсаалтаар сонгогдох хэсэгт дээгүүр эрэмбэлбэл Ардчилсан намыг гэх иргэдийн сэтгэл зүйд баттайяа таатай уур амьсгалыг татна.
Бөхчулууны Пүрэвдорж өнөөдөр Ардчилсан намынхаа даргаас илүү бядтай, бүлгийнхээ даргаас илүү уран тоглогч л доо, улс төрийнхөө дэлгэц дээр. Идэж уусан, элдэв бусармагт орооцолдоонгүй, бас ч гэж бодитой үнэн явж ирсэн шиг байна. Зуны цагт тойрогтоо очоод “хэвтчихдэг”, ачаа нүүдэлд тэмээ хомнолцож, айлын хүүхэд аргадах байдалтай явдаг, тэр нь нэг их хиймэл биш, үнэнд дөт байдгаараа хайрлагдах маягтай болсон товариш шигээр ойлгогддог. Бөхчулууны Пүрэвдоржийг буруутгах зүйлс бас байна аа. Сөрөг хүчний үүргээ биелүүлдэггүй Ардчилсан намаа өөд нь татахад үнэмлэхүй бяраа гаргахгүй байгаа нэгэн гэм байна. Нөгөөтээгүүр суудал залган суусан жаран хэдэн нөхөд чинь, хоёр парламент дамнан өөртэй чинь алхахдаа дөчин их наядын хулгайг улс оронд үүтгэсний бас нэгэн гэм байна. Засаглалцах эрх мэдлийн сэнтийд суугаагүй чинь үнэн л дээ, гэвчиг ингэж улс орноо тонон дээрэмдэж байхад Б.Пүрэвдорж гишүүн шиншилгээгүй, хямгагүй, мэлмий тодгүй явсаныг яалт ч үгүй зэмлэлтэй.
Бөхчулууны Пүрэвдорж оо, одоо наад хулгайчдаа сайн зарлаад, улс төрийн энэ тойрогт ариун нэртэй орон зайтнууд бий болгох талаас ажилла аа. Заамдалцаж, занчилдаж зүтгэ. Эс тэгвээс, өөрийн чинь дуу хоолой намаг шалбаагт хутгалдан, хулгайчдаасаа ер ялгарахгүй бүүдийхээр бүгчим нөхцөлийг суудал зэрэгцээ нөхөд чинь үүтгэж, эрх баригчдын чинь шударга бус бүгдийг бузарласан. Үүнийг сөрж тэмц ээ. Хөрөнгө оруулалт зогссон нийгэм гарилдан хүлээж байна, шударга үнэнийг, шударга эдийн засгийг. Хөрөнгө оруулалтыг зөвхөн өөрсдийнхөө төлөө хийсэн эрх мэдэлд, мэдээлэлд ойрын “буянаар” улсаа тоносон найз нөхөд, ангийн чинь гишүүд, намын тань даргаас эхлээд өөрийн чинь явах замыг өргөсжүүлэн эргэн тойронд чинь бүчээстэй байна.
Энэ улс эх оронд гэрэл гэгээ хэрэгтэй байна. Идлэг уулга, тонологоос нь энэ ард түмэн бүрэн залхан, хилэгнэн бухимдаж, дэлбэрэх шахаж байна. Бөхчулууны Пүрэвдорж гишүүн ээ, дээгүүр толгойтой, тэр нь эх орон, ард түмний төлөө үнэн байх дээгүүр толгойтон баймаар байх цаг мөч үргэлжилж байна.
Дээгүүр том харж байгаа шигээ дэлхмэл үйлсээр улс төрийг хөдөлгөн эмхэлж, засаглалыг авахад бяр тань дутамгүй. Гэрэл гаргаач, Бөхчулууны Пүрэвдорж оо.
З.БАЯРАА
Amlalt.mn
