Гишүүн Дамдины Цогтбаатар гитар тоглож дуулж байгаа бичлэг бүхий бичвэрийг нүүр номдоо оруулжээ. Австралиас үүдэлтэй оюутны сургалтын тэтгэлэг нэмэгдсэнд онцгой талархсанаас мөнөөх гишүүн уг арга хэмжээнд дуулах хүртлээ хөөрсөн бололтой юм. Дуулсан дуугаа хүртэл “Буянаараа л болог” хэмээсэн агуулгатай хэмээн тайлбарлаж. Мөн тэгээд, имфляци, ажилгүйдэл, авлига, Боловсролын зээлийн сан гэх асуудлуудын харанхуйг урж, гэрэл түгээсэн мэдээ байв хэмээн тодотгожээ.
Харанхуйг урах. Сайхан томьёолол. Гэхдээ, нөхөр Д.Цогтбаатар гэрэл түгээхэд манлайлж, харанхуйг үргэлж урах бололцоотой явж ирсэн хүн шүү дээ. Улс төр дэх МГУ, Австралийн гэх маягийн, хамгийн боловсролтой бүлэглэлд хамаарч эрх мэдэл, албан тушаалын байнд үргэлж төв цэгт хадгалагдаж ирсэн хүн гэвэл өөрөө арай үгүй гэхгүй биз.
Ерөнхийлөгчийн зөвлөх, Гадаад хэргийн яамны төрийн нарийн, сайд, Барилга, хот байгуулалтын сайд,удаа дараа УИХ-ын гишүүн гээд тэрбээр хүрч болох бүхий л том албан тушаалд хүрсэн.
Албан тушаалын даллага арвин буянтай явж ирсэн. Харин албан тушаалын арвин даллага нь, ард түмэн, эх орны тусын тулд гээд аваад үзвэл, өөрийн нь хэлсэнчлэн авлигал, ажилгүйдлийн харанхуйтай явж иржээ. Өөрөө ч тэрийгээ хэлж байна. Хэлэхээр барах уу, зөвшөөрөн хүлээх мораль, боловсрол түүнд бий л дээ.
Өнөөдрийн УИХ, Засгийн газар бол, Д.Цогтбаатартай хамт явж ирсэн УИХ, Засгийн газар. Гэтэл яагаад ингэтлээ ёс зүйн уналтад орж, дөчин дөрвөн их наядын нүүрсний хулгайтай, боловсролтой Л.Энх-Амгалангийн толгойлсон яамны дэргэдэх, Боловсролын зээлийн санг эрх мэдэлтнүүд хуйгаараа тонон байхад, ариун нэр төр боловсролт, ёс зүйтэн Дамдины Цогтбаатар хаана байв, яагаад ингэж туйлдан эмхгүйдэж байхад мань Цогтбаатар “үнэр авахгүй явав” гээд үзэхээр түүнд ард түмэн гомдолтой.
Зүй нь, Д. Цогтбаатар шиг сэхээтэн ёс зүй, эрүүл эдийн засагт, жишигт гадаад харилцаа, хөрөнгө оруулалт гээд олон зүйл дээр зүй ёсны манлайллыг үзүүлж, энэ эх орон, ард түмнийг хөгжилд чирэн зүтгэж байх учиртай хүн. Түүний мэдлэг боловсрол, ертөнцийг ойлгосон байдал энэ бүхэнд ухаан туядах учиргүй. Жишээлбэл, Монгол улс өнөөдрийг хүртэл Худалдааны хуульгүй явж ирлээ. Гадаад яам, Эдийн засгийн яамны хавсарга байдалтай л яваад байна. Худалдаагүйгээр, түүнийг зохицуулсан хуульгүйгээр яаж явах юм билээ.
Цогтбаатар үүнд хүчин зүтгэх ёстой. Экспорт гэхэд, манай улс нүүрс зэсээс өөргүй байна шүү дээ. Д.Цогтбаатар Монгол улс юугаараа тэргүүлж, манлайлж хөгжих учиртайг аль эртээ мэдсэн хүн байх ёстой. Мэдэж ч байгаа байх. Гагцхүү түүний үг, үйлдэл, үйлс үүнийг хийхгүй байна, хийхийг хүсэхгүй байгаа ч юм шигээр ойлгогдох, олон түмэнд.
Учир юун хэмээвээс, Цогтбаатар энийг чадчихлаа гэх үлгэр жишээ үйлдэл өнөөдрийг хүртэл тэр үзүүлсэнгүй. Гоё сэхээтэн, боловсролтой гонжоомтон л алхаад байх. Өөрийгөө болгож байгаа юу гэвэл ямар ч маргаангүй. Өрөөл бусдаа тэтгэж байна уу, сонгогчид тойрог гээд яривал учир гүн дутагдалтай.
Тангадын Галсангийн хэлдгээр, овт шаарын буюу оффшорын асуудалд ороолдонги төлөвтэйг Л.Мөнхбаясгалан нэгэн хэсэг бичээд л байсан. Ов мэх нь УИХ-д манлайллаар үзэгдэж, Сонгуулийн хуульд жендер, нийгмийн давхаргуудын тэгш байдал, Гадаад худалдааны хууль, намуудын шилэн байх зэрэгт Д.Цогтбаатар тод байж нэг үзэгдээсэй.
Эс тэгвэл зөөлөн дуугаран ярьж, зөв бурууг төгс дэнслэлгүй явсаар энэ нэгэн Их хурлын бүрэн эрхийг дуусгах нь, тэрбээр. Тэгвэл, юун харанхуйг урж, гэрлийг түгээх билээ дээ,Дамдины Цогтбаатар гишүүн ээ! Та олон түмнээс сонгогдсон төрийн түшээгийн хувиар “Буянаараа болог” гэсэн байдалтай байж хэрхэвч болохгүй шүү дээ.
Б.БАЯР
Amlalt.mn
