Амлалтыг бид нэхдэг. Арайхийж аргалаад дөрвөн жил болчихсон мартаа биз гэсэн амлалтыг нь улстөрчдөөс бид нэхдэг. Угаасаа эд мартдаг, бид мартуулдаг гэж тэд боддог. Цайчихсан. Одоо энэ цайлт нь хэрээс хэтийджээ. Дөрвөн жилийн өмнөх ч биш, жилийн өмнөх ч биш, хоёр сарын өмнөхөө мартаад эхэлжээ, энэ улстөрчид.
“Жендерийн тэгш байдал бол хүний эрхийн асуудал юм. Жендерийн тэгш байдлыг хангахад шаардлагатай хууль эрх зүйн өөрчлөлт, зохицуулалтыг хэрэгжүүлэхэд дэмжиж ажиллана” гээд олон улсын байгууллагуудын өмнө, дэлхийн өмнө, иргэдийнхээ өмнө хоёр сарын өмнө бахархалтай ярьж байсан Г.Занданшатар дарга таны даргалдаг парламент үзэл баримтлалаасаа ухарч байгаа дуулдаж байна.
Сонгуулийн тухай хуулийн ажлын хэсэг дээр жагсаалтад бичигдэх 48 нэрийн 24-т нь эмэгтэйчүүд бичигдэх нь гэхээс эрчүүдийн чинь шил нь татаад эхэлжээ. Гурван эрэгтэйн дараа ганц эмэгтэй орвол орог гэж тэд үзэж байгаа бололтой. ҮХНӨ гэж хүч түрэн батлуулсны дараа юу ч хийсэн хамаагүй гэж үзэж байгаа хэрэг үү.
Угаасаа ҮХНӨ-өөр гишүүдийн тоог 126 болгохдоо 78-ыг нь мажоритороор, 48-ыг нь пропорционалиар гэж заасан. Ердөө жагсаалтын 48-ын 50 хувьд нь эмэгтэй нэр дэвшигчийн нэрийг зоох байтал өөрсдийн өчүүхэн эрх ашгаас хөгжлийн том бодлогоос ухрах гэж байна. Энэ бол зүгээр өнөөдрийн улстөрчдийн орж ирэхдээ хэлсэн амлалтаа гэрээс гарахдаа мартчихдаг бодит дүр зургийн жижигхэн жишээ юм.
Д.Амарбаясгалан дарга аа, дэвшилтэт бодлого гаргаж жагсаалтын 50 хувьд сөөлжүүлэх, жендерийн тэгш байдлыг хангахад эрх баригч нам манлайлан оролцох нь гэж олон түмэн итгэсэн. Амлалтад чинь итгэсэн.
Гэтэл танай намын гишүүдийн хэт олонх бүлэг, хэт олонх багтсан ажлын хэсэг чинь ийм санал гаргаж явааг та дуулсан уу. Амласан амлалтдаа эзэн болж чадахгүй удирдагч, эрх барих намд итгэж хүмүүс санал өгөх үү. Дөрвөн жилдээ хуураад сурчихсан юм байж, хоёр ч хүрэхгүй сарын өмнөхийг хүмүүс мартаж арай амжаагүй байгаа шүү. Манлайлал үзүүлж дүр үзүүлчхээд маргааш нь түүнийгээ мартдаг хүмүүст итгэж санал өгөхөө болино.
Олон улсын өмнө үүрэг амлалт авч, олон нийтийн өмнө нийгмийн талуудын тэгш оролцоог хангана, 50:50 гэж байсан улс төрийн намууд Сонгуулийн тухай хуулиа хэлэлцэх болоод ирэхдээ үүнээс буцаж 25 хувь руу унагавал алтан өмд өмсөж, мөнгөн шаахай өмссөн ч итгэх хүмүүс та нарт олдохгүй.Үргэлж өөрсдийнхөө эрх ашгийн төлөө шийдвэр гаргаж явсаар байгаа өнөөдөр хүргэсэн нийгмээ харцгаа.
Хүний эрхийн мэдрэмжгүй хууль батлах бүрд чинь эгэл жирийн ард иргэд хохирч, лай ланчгийг чинь ирээдүйн үр хүүхэд, шинэ үеийн иргэд чинь ялыг нь үүрч хохирсоор ирлээ. Өнөөдөр энэ хэдэн гишүүдэд чинь нэр дэвших боломж нь багасах гээд байж магад юм.
Гэхдээ насаараа зүхүүлэхгүйн тулд өнөөдөр биш гэхэд дараа үедээ тус болох хуулийг та нар батлуулахад анхаараач ээ. Арай амлалтын чинь үгс замхарч амжаагүй, бичсэн бэх чинь хатаагүй байх үед ингэж ухрах юм уу. Г.Занданшатараа, Д.Амарбаясгалаан, арай үгүй байлгүй, худлаа биз дээ? Өнөөдөр амлалтадаа хэр үнэнч байгаагаас чинь маргаашийн сонгуульд иргэд дүнгээ тавих болно шүү.
З. БАЯР
Amlalt.mn
